2025/2025-2026

Dated Shillong, the 24th October, 2025: Ni hnih thanga Mizoram Sawrkar hna pawimawh kaihhnawih thila Shillong-a zin mek Dr. KC Lalmalsawmzauva, Adviser to Chief Minister (Handholding) chuan sawrkar hmalakna hrang hrang atana mi pawimawhte a kawm.

Adviser to CM chuan October ni 21 leh ni 22 khan Institute of Hotel Management (IHM), Shillong tlawhin, Mizorama Wine Industry tihhmasawnna tur atana tangkai turte helai hmuna thawktute nen hian an sawiho a. Dr. Balabynta Kharshiing, Director, IHM Shillong, leh faculty-te’n lo dawngsawngin, Mizo thalai tam zawkin Hotel Management an zir theih dan tur an sawiho a. IHM campus-a North East Wine Incubation Centre an tlawh nghal bawk. Mizo loneitute tharchhuah thlai atanga wine quality tha siam a nih ve theih nana training pek dan turte an sawiho bawk.

Dr. KC Lalmalsawmzauva hian Indian Institute of Management (IIM), Shillong tlawh bawkin Mizorama kalpui mek Bana Kaih (Handholding) Scheme hnuaia thlai thlan bik - sawhthing, Mizo hmarcha te, aieng leh hmunphiahte hralh chhuah dan tihchangtlunna tur ruahmanna an sawiho a. Dr. Naliniprava Tripathy, Director, IIM Shillong chuan Mizoram Sawrkar hnenah a hma thei ang bera an project siamte an lo thehluh tur thu a lo hrilh a ni.

Adviser to CM chuan Pu Satinder Kumar Bhalla, Secretary, North Eastern Council (NEC) leh Dr. Arun Kumar Sarma, Director General, North East Center for Technology Application and Reach (NECTAR)-te pawh hmu bawkin, Mizoram sawrkarin thlai thar sawngbawlna kawnga a mamawh thenkhat phuhruk tura ruahmanna kal mekte a bawhzui a. NEC leh NECTAR hnuaia sawhthing sawngbawlna project thehluh tawhte an bawhzui dan enpuiin, anni lam chuan theihtawp an lo chhuah mek thu an lo hrilh a ni.

Dr. KC Lalmalsawmzauva, Adviser to Chief Minister chuan Meghalaya Agriculture and Farmers’ Welfare Minister Pu Timothy D. Shira pawh kawmin State pahnihte’n thlai thar hralhna an buaipui dan hrang hrangte sawidunin hmasawnna awm thei turah a theih anga thawhho zel an rel a ni.

Adviser to Chief Minister hi Mizoram Sorkar hnuaia wine siam dan kaihhruaina duangtu Working Committee member-te leh Shillong-a Mizo Welfare hruaitute’n an tawiawm a ni.