4784/2024-2025

Champhai, 24th March 2025: Vawiin khan I&PR Auditorium, CHANEM-ah Champhai CMO Office buatsaihin World TB Day 2025 pualin hun hman a ni. Adviser to CM, Champhai North bialtu ni bawk Er. H. Ginzalala chuan khuallian niin he hun hi a hmanpui a, kum khat chhunga TB vei hmuhchhuah thar awm lohna khua ‘TB Free Village’ te hnenah lawmman a hlan a ni. Champhai Bawrhsap Pu Mohammad Aaquib chuan khual zahawm niin he hun hi a hmanpui bawk.

Khuallian Er. H. Ginzalala chuan he hunah hian TB natna do tura hmalaknain rah ṭha a chhuah ṭan mek chu lawmawm a tih thu a sawi a. Undivided Champhai District huam chhungah kum khat chhunga TB vei hmuhchhuah lohna khua 20 lai an awm chu thawktute inpekna leh mipuite thuawihna rah chhuah ṭha tak a ni, a ti.

Adviser to CM chuan TB natna do turin thawhrimna leh tih tak takna a pawimawh a, “Kan ei leh in bakah kan nitin nun danin kan hriselna a nghawng a ni tih kan hriat thar ṭheuh a ngai a ni,” a ti bawk.

Champhai North bialtu MLA chuan TB natna mai bakah hian nun danin a zir loh avanga natna (lifestyle disease) hrang hrang hluar zel pawh nasa taka do a ṭul tih a sawi a. Mihringte ei duh zawngin eizawnna nasa taka a nghawng avangin, thil hrisel kan ei tam chuan thlai leh thei tharchhuaktu kuthnathawktute tan kawng ṭha zawk kan hawng thei ang a, kan hriselna atan pawh a ṭha dawn a ni, a ti bawk.

Khual zahawm Pu Mohammad Aaquib chuan TB natna do tur chuan sawrkar mai bakah khawtlang leh kohhran ṭanhona a pawimawh a tih thu a sawi a. TB vei ten an thihpui loh nan hma taka natna hmuhchhuah (early detection) kawngah ṭan lak tul a ni, a ti bawk. Champhai Bawrhsap chuan TB natna do kawnga thil pawimawh tak chu faina leh thianghlimna kawnga hmasawn a ni tiin, Champhai khawpui leh District a lo fai zelna kawnga thawhpuiah mi zawng zawng a sawm a ni.

He huna tarlan danin Champhai District (Undivided) chhungah hian January 2024 aṭanga February 2025 chhungin TB rinhlelh test mi 2437 an awm a, mi 146 in TB an vei tih hmuhchhuah a ni a, TB thihpui mi 9 awmin, mi 71 in TB inenkawlna an la mek a ni. He mi hun chhung vek hian MDR -TB rinhlelh test mi 422 awmin, mi 9 in MDR-TB an vei tih hmuhchhuah a ni bawk.

Vawiina World TB Day puala hun hmanah hian kum khat chhunga TB vei hmuh lohna khua 20 hnenah chawimawina thuziak leh award hlan a ni a. TB vei te eitur chaw ṭha petute hnenah chawimawina hlan a ni bawk.

TB Free Village lawmman dawngtute chu

Khawbung RD Block
1. Sazep
2. Zawlsei
3. Thekpui
4. Saikhumphai

Ngopa RD Block
1. Pawlrang
2. Kawlbem
3. Khawkawn

Khawzawl RD Block
1. Ngaizawl
2. Dulte
3. Khualen
4. New Chalrang
5. Vanchengpui
6. Aiduzawl

Champhai RD Block
1. Lungphunlian
2. N. Diltlang
3. Chhungte
4. Champhai Jail Veng
5. Hrianghmun

East Lungdar RD Block
1. Riangtlei
2. Tlangmawi; te an ni.

TB veite eitur chawṭha petute hnenah - Nikshay Mitra Award hlan a ni bawk a. He chawimawina hi Hotel Chawngthu ( TB patient pahnih chawmtu) leh North Eastern Development Finance Corporation (NEDFi) (TB patient paruk chawmtu) te hnenah hlan a ni.

World TB Day puala hun hman hi Dr. C. Lalhmingliana, Sr. CMO, Champhai chuan a kaihruai a. Dr. Vanzarliani, Dy. CMO; Pu Lalrawngbawla, TB Champion bakah District Tobacco Control Cell (DTCC) leh District AIDS Prevention and Control Unit (DAPCU) aiawh te pawhin thu an sawi a, Pu David Lalchhanhima, Senior Treatment Supervisor-in lawmthu sawiin inkhawm hi a titawp a ni.