3523/2024-2025

Dated Aizawl, the 13th December, 2024: Vawiin khan Adviser to CM Pu TBC Lalvenchhunga chuan Mizoram StartUp Mission(MSUM) hub a tlawh a, an hmun hma te enin, office an kalpui dan te a zawt a, thawktute nen meeting an nei bawk.

Pu TBC Lalvenchhunga chuan, Mizoram Startup Mission hmalakna te chu fakin an programme “Kailawn” leh “Rahbi” te chuan Mizo thalaite zingah nghawng tha tak a nei chho mek zel nia a hriat thu a sawi.

"Mizoten sumdawnna lama hma kan sawn theih loh chhan lian ber pakhat chu kal phung fel vawn (formalization) lama kan pachhiat vang niin ka hria a, Proprietorship bak pelh harsa kan ti thin. Tun hnaiah kan thalaiten private limited company din an uar ve tan a, hei hi hmasawnna hlu tak a ni. Heng thalai te hian Startup lama hma an sawn theih nan sorkar chuan Venture Fund a ruahman a, tangkai takin an la chhawr chho ngeiin kan ring. Entrepreneurs tha neih hi kan ramin a mamawh em em a ni", a ti.

Meetingah hian Pu Rinzuala, CEO, MSUM chuan MSUM din a nih dan te, an hmalakna te a sawifiah a. Mizoram Startup Mission an nih hmaa Planning Department hnuaia Committee leh Cell anga kal thin a nih dan te, kum 2022 atanga MSUM tih hming pua Society din a nih tak thute a tarlang. An thil tum ber chu "Startup Culture tha Mizorama a awm theih nana hmalak a ni", a ti.