127/2025-2026

Aizawk the 10th April, 2025: India rama entrepreneurship tihmasawntu Institute tha ber pawl, IIM Bangalore NSRCEL chuan Mizoram an rawn tlawh a. Ni thum chhung Mizoram startup leh entrepreneurs te an zir chian hnuah nimin tlai lam khan Adviser to CM Pu TBC Lalvenchhunga, Chairman, Mizoram CSR Cell ni bawk nena inkawmna Planning Department Committee Room ah an nei.

Pu TBC Lalvenchhunga chuan, Mizoram CSR Cell anga Bangalore-a an zinna chuan rah tha a chhuah nghal chu lawmawm a tih thu a sawi a. Bangalore-a an hmunpui an tlawh tum a, NRSCEL ten tha taka an lo dawnsawn dan te a sawiin, an sawmna anga Mizoram an rawn tlawh nghal a, startup ecosystem zirchianna an rawn nei hi a hlu hle a ni, a ti. 

Mizoram sorkar chuan entrepreneurship leh startup chawikan nan Handholding Scheme a duan bakah Venture Capital fund a siam a. Thalai tam takin an chhawr hle dawn a ni. Tin, he mi lama hmalaknaah hian NSRCEL leh Mizoram thawhhona thain nasa takin min pui dawn niin kan hria, a ti bawk.

NSRCEL hi startup incubation centre niin, IIM - Bangalore hnuaia awm an ni a. Thawktu lo kal te hi Mizoram Startup Mission in lo dawngsawngin, Commerce & Industries Dept, MZU Incubation centre, TILI leh entrepreneur hrang hrang te an tlawh a. Mizoram chuan an rin aia entrepreneurship lama hma an lo sawn thu te sawiin, hmasawn zelna tur nia an hmuh ang te an sawi nghal a ni. Mizote chu potential tha tak an nei ni a an hriat thu an sawi bawk.

Pu TBC Lalvenchhunga hi Dr. Lalrinchhana, Principal Adviser Cum Addl. Secretary chuan a tawiawm a ni.