4818/2025-2026

Champhai, dated 13th March 2026: Adviser to Chief Minister (Finance & Planning) Pu TBC Lalvenchhunga chuab vawiina Zotlang Sports Stadium, Champhai Chapchar Kut 2026 lawmna chu Kut Pa niin a hmanpui a, Champhai Bawrhsap Pu Mohammad Aaquib chu Kut Thlengtu niin "Zo Nun Ze Mawi - Inremna" tih thupui hman a ni.

Kut Pa Pu TBC Lalvenchhunga chuan thu sawiin mahni khua ngeia he Chapchar Kut hun hlu tak hmang tura an sawm avangin buatsaihtute chungah lawmthu a sawi a. Zonun ze mawi inremna tih thupui hi pawimawh tak a ni a, kan hnam zia hian Mizo kan nihna a tichiang em em a ni tih a sawi a. Kan ze mawi, heng - tlawmngaihna, inremna leh thuawihna te hi hnam dangin min ngaihsanna a ni a, hnam anga kan ropuina tilangtu a ni tih a sawi. Chuvang chuan Zo nun ze mawi hi vawiin kalkhawmte'n kan hlut zel a pawimawh a, chhawm nung reng turin an sawm a. Thangtharte leh thalaite hnena hriatna hlanchhawn kawnga thawk tha em em YMA leh MUP te he kawngah hian an hlu leh zual a, an thawh thatna chu fakin zirtir chhunzawm zel turin a chah bawk. Inremna hian awmze tam tak a nei a, a awmzia pawimawh ber chu boruak tha lo siamtha tura mihring leh mihring inkara inremna hi a ni tih a sawi a. Inremlohna hi Zonun ze mawia tel lo - chapona te, inhriatthiam lohna te, dawhtheihna neih loh te leh inngaihdam theih loh te hi kalkhawm mipui chuan do tlat turin a chah a, Champhai hian tourist a hip nasat zel avangin khual chhawn thiam te zir zel a tul chho dawn tih sawiin dawhtheihna leh ngaihdam theihna nei zel turin a chah a. He Zonun ze mawi hi kan chhawm nun zel chuan Champhai hi district entawn tlak a ni thei tih sawiin hun hlimawm tak hmang turin duhsakna a hlan a ni.

He hunah hian Kut Thlengtu Pu Mohammad Aaquib chuan inlawmna thu a sawi a, District MUP-in hlado an chham a. Intihhlimna chi hrang hrang awmin Mizo hnam lam chi hrang hrang YMA Branch te leh MHIP te'n an pho chhuak a, zai ngaihnawm tak tak zaithiam milar leh Champhai MZI atang te'n ngaihthlak a ni bawk. Mizo incheina mawi tak tak hmuh tur awmin a inchei nalh ber te hnenah lawmman sem a ni a, lawmman dawngtute chu hetiang hi an ni:

Naupang kum 5 hnuailam

Mipa - Jedidia Lalrinawma, Champhai Venglai

Hmeichhia - Esther Lalthafamkimi, Champhai Electric Veng

Naupang kum 6-10

Mipa - John Malsawmtluanga

Hmeichhia - Ruthi Lalruatsangi, Champhai Vengsang

Kut Lanu - Zairemmawii, Champhai Kahrawt

Kut Val - Lalawmpuia, Champhai Vengthlang