No.517/2021-2022 

Dated Champhai, the 14th May, 2021: Champhai District chhung Indo-Myanmar ramri depa awm Zokhawthar khuaa vawk pul hri hlauhawm tak African Swine Fever (ASF) leng mek, tun thlenga vawk 49 in an thih phah tawhna inkaidarh a nih lohna tura hmalakna kalzelah vawiin khan A.H & Vety. Department, Champhai District chuan vawkin leh a vel vawn thianghlimna tur Bleaching Powder chu Champhai khawpui chhung leh ramri dep khuaahte an sem chhuak tan a, hman mai theih tur 2% Bleaching Solution siam dan leh hman dan turte an zirtir nghal zel bawk a ni. 

A.H & Vety. Department, Champhai District thuchhuahin a tarlan dan chuan ASF chu vawk hri hlauhawm tak, a enkawlna damdawi leh vaccine pawh awmlo a ni a. He hrileng darh zel tur laka inven chu tih theih awm chhun a nih rih mai thu leh inven nan hrivei vawk lakluh loh, vawk damlo talh loh, vawkin intlawhpawh loh, vawk thi tha taka phumbo leh vawkin tih thianghlim ngunte a pawimawh hle thu a tarlang a. District A.H & Vety. Officer Dr.B.Zonghinga chuan vawk vulhtute chu mahni vawkin ti thianghlim tha a, ASF pumpelh theuh tum turin a chah a ni.

Bleaching Powder hi Champhaiah a awm mai loh avangin Champhai District chhunga  MLA pathum (3), Law & Judicial Minister Pu T.J Lalnuntluanga (Champhai South), Health & Family Welfare Board Vice Chairman Dr.ZR. Thiamsanga (Champhai North) leh Bamboo Link Road Board Vice Chairman Pu Ramthanmawia (East Tuipui) te hmalaknain Aizawl atangin Bag 50 zet leh 400 gram Pack, case 5 lai dawn a ni a. Hengte hi vawiin khan Champhai Town chhung leh ramri dep khua hnaivaiahte bag khat theuha sem phawt a ni a, ruahman dan chuan naktuk hian Hnahlan tlangdung leh East Tuipui bial ramri dep khuaahte sem  chhunzawm tum a ni.