2548/2022-2023
Khawzawl, the 4th November, 2022: Khawzawl District leh Mizoram District dangahte Vawk natna African Swine Fever (ASF) hmuh chhuah a tla hniam zel a, Khawzawl District chhungah thla thum (3) liamta chhungin he natna avanga Vawk thi hriat a ni lo a ni. Ram dang leh State dang atangin African Swine Fever (ASF) hri hi lo lut leh thei reng a nih avangin hemi laka inven nan Khawzawl District Magistrate, Pu C.C. Lalchhuangkima chuan Section 133 CrPC, 1973 in thuneihna a pek angin a hnuaia khapna thupek hi vawiin khan a chhuah:

1. Khawzawl District chhungah State pawn leh ram dang atangin Vawk, Vawksa leh Vawksa atanga eitur siam chi reng reng lakluh khap tlat a ni.
2. Mizoram District dang Infected Area-a puan khua atangin Vawk, Vawksa leh Vawksa atanga siam eitur reng reng Khawzawl District chhungah lakluh khap tlat a ni.

3. Vawk damlo reng reng talh leh hralh khap tlat a ni a, Vawk damlo chu dah hran vat tur a ni. Vawk thi reng reng paih mai lovin thuk takah phum bo nghal thin tur a ni.

4. Vawk talh tur ten Vawk hrisel tha chauh talh tur a ni. AH & Vety. Department atangin Vawk hrisel leh mihring ei tlaka hrisel a ni ngei tih certify tir thin tur a ni.

5. Vawk damlo leh thi a awmin, AH & Vety Official-te hnenah hriattir thin tur a ni.

6. Hrileng darh zel loh nana Vawk suat duh ten AH & Vety Department-ah dilna thehluh tur a ni.

He thupek zawm lote chu IPC Sec 188 hmanga hrem theih an ni ang. He khapna thupek hian thupek dang tihchhuah a awm a nih loh chuan, thupek chhuah a nih atanga thla hnih chhung a huam ang.