No.834/2020-2021

Vawiin khan Agriculture Minister Pu C. Lalrinsanga hovin Agriculture Development Board chuan COVID-19 Lockdown thawhthumnaa loneitute tana ruahmanna leh Mizoram buh leh bal thar kawnga hmalaknaah te inrawnkhawmna an nei.

Agriculture Minister leh Agriculture Development Board Chairman Pu C. Lalrinsanga chuan Lockdown thawhthumna kalpui a lo tul takah chuan Board-in loneitute hmakhua ngaihtuaha inrawnkhawmna hun hman hi tih makmawh a ni, a ti a. Minister Pu C.Lalrinsanga chuan Mizoram-ah Lockdown avangin mahni eitur thar chhuah kawngah mitin an thangharh a, a thei theiin chuktuah huan bakah mahni inbul hnaiah leh a theihna hmun tinrengah thlai thar neih tumin hma an la a ni, a ti a. Ramin a mamawh em em damdawi tel lo leh ram leilung ti chhe lo a lo neihdan ‘organic farming’ pawh sawrkar chuan uar zelin hma a lak belh zel bawk a ni, tiin a sawi. COVID-19 dona kalzel piah lamah hri a lo kian deuh hnu thleng pawhin buh leh bal thar kawnga sawrkar ruahmanna awm tawhsa te chu a pawimawh zual sauh dawn tih Minister chuan a sawi bawk a ni.

Agriculture Development Board chuan COVID-19 avanga loneituten harsatna an tawhloh nana Agriculture Department hmalak tawhna hrang hrang – Agriculture Minister hova DC leh DAO te nena Video Conference meeting a an rel angin, loneituten an hna tluang taka an thawh chhunzawm zel theihna tura lo feh turte tan harsatna siam lo turin DC te a sawipui tawh thu te, puih an ngaihna huna lo tanpui thin tura DAO te hriattir an nih thu te, ni 04.04.2020 atanga Farmers’ Helpline kaltlanga loneitute mamawh leh harsatna mithiam ten an dawngsawng thu te, thlai chi thlak chungchang a Aizawl Bawrhsap hnena Agriculture Minister in ruahmanna a siam sak tawh chungchangte, Focus District pali- Champhai, Serchhip, Kolasib leh Mamit hnuaia khaw hrang hrang tan Value Chain Crops- Sawhthing, Aieng leh Mizo Hmarcha chi te sem a nih thu te, Sub-Mission on Agriculture Mechanization (SWAM) hnuaiah Custom Hiring Center 50, Power Tiller 75, Mini Power Tiller 75 leh Paddy Transplanter te subsidy-a pek tura ruahman a ni thu leh, Power Tiller hi semchhuah tan a ni thu te, PM-KISAN hnuaia loneitu 80,888 te account-ah April ni 22, 2020 thleng khan Rs. 16,17,76,000/- thun luh sak an ni tawh thu te, loneitute sum lakluh a lo pun theihna turin tuna Vaimim an chin hi seng zawh a nih hnuah Vaimim bawk emaw, lei that nana nitrogen fixation ti thei tur Bekang emaw Chana emaw ching tura hma lakpui a nih thu te leh SEDP hnuaiah Be (pulse)- Arhar, Rajma, Field Pea te 1,400 acre a zauvah chintir tum a nih thu te sawi a ni.

Board member ten Mizoram thingtlang khuate ei leh bar dinhmun survey report an siam chu he hunah hian enho niin loneitute tana harsatna la awm theite bakah chutianga tana ruahmanna awm thei ang te sawiho a ni a; Agriculture Minister-in ruahmanna asiam angin Agriculture Development Board member te chu Team 3 ah in thenin khaw hrang hranga loneitute tlawhtur in an in ruahman a ni.

Agriculture Development Board hian COVID-19 avanga buh leh bal thar kawnga Mizoram mamawh hrang hrang pawh sawrkar laipui a thlen turin Mizoram sawrkarah a thlentawh a, chak taka hmalak a ni bawk a ni.

He hunah hian Agriculture Development Board Vice-Chairman Pu H. Biakzauva, Lawngtlai E bialtu MLA leh midangte an tel a ni.