No.4031/2020-2021 

Vawiin khan sawrkar flagship programme SEDP hnuaia din Agriculture Development Board chu an Chairman, Agriculture Minister ni bawk Pu C. Lalrinsanga hovin a pisa ah review meeting an nei a, kumin Rabi season atana inpuahchahna tur ruahmanna te an thlirho bawk.

Agriculture Minister chuan he meeting ah hian thu sawiin thla hmasa atanga inpuahchahna kal tawh a nih anga loneitute dinhmun hre rengin COVID-19 vanga harsatna karah pawh Board thutkhawm chu tihmakmawh a ni, a ti a, kumin Kharif Season ah Agriculture Department chuan Vaimim chingin hma a la a. Tunah hian a thar hun a lo nih chhoh tak avangin post-harvest programme ruahmanna awm tawh te thlirhona neih vat a tul hle a ni, a ti a. Rabi season atana inpuahchahna tur ruahmanna siam thuai a nih loh chuan COVID-19 avang pawh hian a khawtla palh theih a ni, a ti.

Kumin Rabi season a chin uar atan hian Field Pea, Rajma leh Tel Antam thlan a ni a. Heng thlai chin nan hian National Food Security Mission hnuaiah Ram hectare 920 leh SEDP hnuaiah Ram acre 1400 ah inthlurbing ni se tiin vawiina Agriculture Board thukhawm chuan a rel a. Thlai chi thar hlawk leh thar hma ngaihtuah ran tum niin, loneitute mamawh hrang hrang pawh a hma lama ngaihtuahsak an rel a ni. Kumin Kharif season-a vaimim chin dan tur inkaihhruaina mumal tak an lo siam tawh angin Rabi season a hman tur inkaihhruaina felfai leh khawng taka kalpui tur siam leh a pawimawh thu sawi a ni a, loneitute pawhin Kharif season atana inkaihhruainate an zawm that avangin Agriculture Development Board chuan lawmthu an sawi bawk.

Kumin Kharif Season khar turah hian Mizoram Farmers' Interest Group hrang hrang 79 ten ram acre 2500 ah vaimim quintal 20000 vel thar thar tura target siam chu an pha thei tura ngaih a ni a. Post-harvest loss hi vaimim ah hian a nasat bik avangin Board meeting chuan action plan an buatsaih nghal a. Low cost storage drying, transportation of harvested maize leh handling chungchangah te ruahmanna tha tak siamin loneituten kumin Kharif season harsatna lian tham tawk lova an khar theih nan post harvest strategy mumal tak duan a ni bawk.

Kumin Kharif Season tawp tur leh Rabi Season intan tur inkar (Transition period) ah hian vaimim sengna hmun awl remchangah bekang leh behliang lchin tura ruahmanna awm tawh sa chu a tha an tih thu an sawi bawk.

Vawiina Agriculture Development Board meeting chuan One District, One Crop pattern atana thlai thlan dan tur te, The Farmers (Empowerment and Protection) Agreement on Price Assurance and Farm Services Ordinance, 2020 te, The Farmers’ Produce Trade and Commerce (Promotion and Facilitation) Ordinance, 2020 leh tunhnaia Central Sawrkarin Agriculture Scheme thar a siam te bakah Agriculture Produce and Livestock Marketing chungchanga dan thar duan mekte uluk taka sawihovin inrawntlanna hun an hmang bawk a ni.

Meeting ah hian Agriculture Development Board Chairman (Agriculture Minister ni bawk) Pu C. Lalrinsanga, Vice Chairman Pu H. Biakzaua MLA, Agriculture Commissioner & Secretary Pu Lalhmingthanga IAS, Agriculture (R&E) Director Dr H. Saithantluanga, Agriculture (CH) Director Pu Rohmingthanga Colney leh member dang te an tel a ni.