No.1085/2020-2020

Nimin khan Agriculture Development Board Vice Chairman Pu H.Biakzaua MLA leh a Team-te chuan Khawzawl District an tlawh a, DLTF leh Sub-Committee on Enhancement of Food Production member-te nen inkawmhona hun Khawzawl DC Conference Hall-ah an nei a, ei leh bar thar chhuah kawnga hmalak dan tur an sawiho.

Agriculture Development Board Vice- Chairman chuan sawrkarin buh leh thlai lam tharchhuah tam chu a thupui ber pakhat a ni tih sawiin buhfai bikah phei chuan mipui mamawh hmun thum a thena hmun khat pawh state in a tharchhuah mang loh avangin tan lak nasat a tul thu a sawi. COVID-19 avangin khawvel ram hrang hrang ten harsatna kan tawk mek tih sawiin buh leh thlai te hi state dang atanga rawn lut tur awm lo thei a nih avangin Mizoram chhungah theih anga tam tharchhuah hi mitin tihmakmawh a ni, a ti. SEDP hnuaiah a bik taka Vaimim leh Be lam chi (pulses) uar zual a ni ang a, vaimim ching tu turte pawh thlan fel an ni tawh a, an ching tan mek tawh a ni, ati bawk. Vaimim tichhe tu pangang Fall Army Worm leh harsatna dang awm theiah pawh Sawrkar chuan theih ang angin hma a la lawk a, kut hnathawktute tharchhuah ang ang pawh sawrkarin a lei theih ngei a rin thu a sawi. Central Sawrkarin loneitu te tana Scheme a siam Pradhan Mantri Kisan Samman Nidhi (PM-KISAN) leh Scheme dang dangah te pawh kuthnathawk tute chu inziaklut tura tanpui ve turin helama thawk tute a chah bawk. Kuthnathawk tute'n tui taka hna an thawh theihna boruak siam tum turin Deparment hotute a ngen a ni.

Sawihona hi Khawzawl DC Pu H. Lianzela'n a kaihruai a. COVID-19 avanga harsatna ramin a tawh theih te thlira Khawzawl District chhunga buh leh bal hlawk zawka thar chhuah theihna tur atan hmalakna hrang hrangte sawiin mipuiten buh leh thlai lama intodelh duhna thinlung an pu chho zel chu lawmawm a tih thu a sawi a. Hemi atan hian thlai chinna hmun tha- Kang Bur, Bawn Zawl leh Tiau Zaute pawh District Inspection Team ten a hmunah ngei an lo en tawh thu leh Project Proposal buaipui tura ruat Core Committee ten an buaipui mek thu a sawi bawk.

Core Committee Chairman Dr Henry Saplalrinliana, Sr Scientist & Head, Khawzawl KVK, in Kangbur, Bawn zawl leh Tiau Zau-a hma lak tum dan power point presentation hmangin a sawifiah a. Line Department hrang hrang - Agriculture, Horticulture, EF&CC, AH & Vety, KVK, Soil, Irrigation & Water Resources, PWD leh RD te'n chan bik insem a an hna tur chin siamfel a nih dan te, tanhona (convergence) kalpui tum a nih dan te leh a theih chin chinah Scientific Method Slope Agriculture Land Technology (SALT) hman tum a nih dan te a sawifiah a ni.

He hunah hian Agriculture Development Board member lokal te bakah kuthnathawk tute aiawh ten thu an sawi bawk a, Khawzawl SDAO in Khawzawl District chhungah Vaimin chi Quintals 23 semchhuah a nih tawh thu te, Vaimim ei chhe tu pangang Fall Army Worm (FAW) hi Ngaizawl leh Rabungah te report a awm tawh thu leh chhiatna thlen tur khawpa nasa anih loh thu bakah hma lak mek a nih thu a sawi bawk.