23/2022-2023

Ṭau thla ni 2, 2022: Tukin khan Lawngtlai East bialtu MLA, Agriculture Development Board Vice Chairman Pu H. Biakzaua chuan Lawngtlai Council Vengah Sub Centre Clinic thar a hawng.

Pu H. Biakzaua chuan Mizoram sawrkarin mipui hriselna a ngai pawimawh hle tih sawiin, Chief Minister leh Health Minister te'n theih tawp an chhuah zarah Lawngtlai East bial chhungah ngawt pawh Sub Centre Clinic sawm leh pakhat lai mai dah thar a nih dawn thu a sawi a. Hei hi hmasawnna lawmawm tak a nih thu sawiin, mipui lam tan a ṭangkai hle dawn a ni, a ti.

Lawngtlai East MLA chuan Sub Centre Clinic chu uluk taka enkawl zui turin health department hnuaia thawktute chahin, neitu rilru pu-a enkawl turin khawtlang hruaitute leh veng mipuite a chah bawk.

Sub Centre Clinic thar hawnna inkhawm hi Lawngtlai Chief Medical Officer Dr LP Malsawma'n a kaihruai a. He hunah hian health department hnuaia thawktute leh khawtlang hruaitute leh khawtlang mipui eng emaw zat an kal khawm a ni.

Health Sub Centre Clinic hi Sub Centre hnuaia awm niin, awlsam zawka mipuite'n an pan theih tura ruahman a ni a. Tukina hawn tak Council Venga Sub Centre Clinic hi Lawngtlai Vengpui Sub Centre hnuaia awm tur a ni. Lawngtlai East bialtu MLA Pu H. Biakzaua chuan Council Veng Sub Centre Clinic hawn thara thawk tur chu MLA Fund aṭangin a hlawh pek a nih tur thu a sawi.