Vawiin chawhma dar 11:30 khan Agriculture Technology Management Agency (ATMA) bultuma District Agriculture Department leh District AMFU tangkawpin an buatsaih, Crop Exhibition Cum Farmers\' Training chu Champhai Chanem-ah neih a niin, he hun hi Agriculture (Crop Husbandry) Director Dr. C. Lalzarliana\'n a hmanpui.

He Exhibition-Cum-Farmers\' Training ah hian Chanem Ground Floor-ah Champhai District chhunga kuthnathawktuten kumin chhunga an thlai thar chi hrang hrangte an pho chhuak a. Dr. C. Lalzarliana\'n thlai thar pho chhuah hawnna leh enfiahna a neih hnuin I&PR Auditorium ah Farmers\' Training neih chu a hmanpui nghal bawk.

Champhai District DAO Pu James Lalsiamliana kaihhruaiah hian Dr. C. Lalzarliana chuan eitur neilo tamchhawl an zahawm ngai lova, ei leh bar a intodelh lo ram an changkang ngai lova, purchaw nun a zahawm thei lova tangka ngah tak, ei leh bara intodelh lo ram chuan tlak chhiat hun a nei thin tih tarlangin, intodelh tur chuan ei leh barah kham khawp thar chhuah a ngai a, nitin mamawh leh kum khat chhunga kan tla tur thar chhuak tura chhungtin hmalak a pawimawh dan leh kut hnathawktuten sorkar kut ringawta innghat loa, mahni hmazawn theuhah hlawhtling tlaka hna thawk tur leh hlawk zawka thlai thar tura hriatna tipung turin a fuih a, kut hnathawhtuten thlai tam zawk an thar theih nan kumin hi buhbal thar tam kumah sorkarin a puang a, tunlai thiamna hmangin ram hectare 3000 a zau ah SRI (System of Rice Intensification) buh ching tura hmalak a niin, kum dang aia thar tam a beisei thu leh kum lo kal leh tur pawh buhbal thar tam lehzualna ah puan leh kan tum a ni, a ti.

He hunah hian AMFU Hqrs Vice President Pu Lalhlawhliana, District AMFU President Pu Taithuama leh Pi R. Lalramhluni SDAO Champhai ten thu an sawi a, loneituten hlawk zawka thlai an thar theihna tur leh thlai enkawlna kawnga awmze nei zawka hmalak dan tur leh thlai natna chi hrang hrang enkawl dante mi thiamte kaltlangin Power Point Presentation hmanga neih a ni.