1543/2026-2027 

Dated Aizawl, the 28th July, 2026: Vawiin khan Agriculture & Farmers' Welfare Minister Pu PC Vanlalruata kaihhruaina hnuaiah Mizoram Agricultural Marketing Board (MAMB) chuan Market Intervention Scheme (MIS) 2024-2025 hnuaia sawhthing aṭanga pawisa a dawn cheng 9,48,14,281/- chu state sawrkar hnenah an hlan.

State sawrkar aiawhin Finance Department Secretary Pu Ramchuana'n pawisa hi a dawng a. Finance Department chuan State sawrkar account-ah an deposit leh dawn a ni.

Market Intervention Scheme 2024-2025 hnuaiah hian MAMB chuan sawrkar laipui Ministry of Agriculture & Farmers' Welfare hnen aṭangin pawisa a dawng a; kuthnathawktute hnen aṭanga Mizoram sawrkarin sawhthing a leinaa sum a hloh (net loss) zawng zawng zat aṭanga chhutin za zela 75 chu sawrkar laipui hian a tum sak dawn a. Chuvangin, he scheme kal tlanga sawrkar laipuiin Rs. 9,48,14,281/- a pek chu MAMB chuan state sawrkarah a chhung lut leh ta a ni.

Meeting-ah hian MAMB Co-Chairman leh Adviser to CM ni bawk Dr. KC Lalmalsawmzauva; Agriculture & Farmers' Welfare Department Secretary Pi Ramdinliani IAS; Horticulture Department Secretary Pi Maria CT Zuali IAS; Finance Department Secretary Pu Ramchuana MF&AS leh MAMB member dang te an tel a ni.