Vawiin khan Agriculture Department hotute chuan an Director Pu C.Lalzarliana hovin Kawnpui-a Tialte Zau fang kualin ramneitu mi 76 te hnathawh leh hlawhtlinna hrang hrang a hmun an en a. Red Oil Plam chingtuten kalkawng chungchanga harsatna lian tak an nei mek chu ngaihtuah sak an tum thu an hrilh.

Vawiin vek khan Kawnpui Venglai YMA Hall-a Tialte Zau Association Assembly an neih chu Agriculture hotute hian an hmanpui nghal a. Assembly hmangtute hmaah thusawiin Agriculture Director chuan an department hnuaia hna thawh reng reng atana sum awm zat chu mipuite hriat theihin puanzar a ni zel ang a, hnathawh dan chungchangah pawh officer zawng zawng-in sawihona neiin sorkar duhdan angin langtlang takin kalpui a ni ang tih a sawi. Sorkar chuan hnathawktute mamawh ang apiang chu tihhlawhtlin sak zel a tum a, chuvangin hna thawk tha leh tam apiang an vannei dawn a ni, a ti.

Pu Lalthansiama, DAO Kolasib chuan Kolasib District chhungah Red Oil Palm Kung 3,43,206 phun a ni tawh tih a sawi a. Nikum 2012 khan a rah Metric Tonnes 766 thar chhuah a ni a, a chingtu te leisak nan cheng Nuai 36 zet hman a ni, a ti. Kumin 2013 hian ram hectares 432 zeta zauah chin leh tumin hma lak mek a ni, a ti bawk.

He hun ah hian Tialte Zau Association member zawng zawngte chuan kuminah ram tikang lo tur leh Zau chhunga luisa leh nungcha zawng zawng humhalh tlat turin thu an intiam bawk a ni.

Tialte Zau-ah hian Agriculture Deptt mai bakah, Horticulture Department leh Minor Irrigation te pawhin nasa takin hma an la mek a ni.