Vawiin chawhma khan Pu R.Lalzirliana, Minister, Home, Agriculture,etc., leh Pu Lalrinmawia Ralte, Minister of State, Environment & Forests, Soil & Water Conservation,etc., te chuan Khamrang ramchhunga mimal leh society anga thelret kung, Red Oil Palm, Balhla, hmunphiah, lakhuihthei leh thelret tiak chingtute hmun hma an tlawh a.

Minister pahnih te hi Agriculture Director Pu C. Lalzarliana leh Agriculture Department a thawk te, Kolasib DC Pu Jitendra Yadav, Kolasib SP Pu R.P. Meena leh sawrkar mi pawimawh ten an zui a. Khamrang plantation a sum chang thlai huan neitute - Pu Lalnunkunga Sailo, Chaltlang, Pu Lalthanzauva, Laipuitlang, Pu P.C. Lalhriatpuia Electric Veng leh Exodus Rubber Society hotuten sawrkar mipawimawh te hi an lo dawngsawng a ni. Huan chhung, thlai kung, tui dah khawlna,drip irrigation system, Tlawng lui vaukam lehlam atanga ral lehlam a thlai rah phurhna tur quital 5 phur thei ropeway siam mek te leh inkalpawhna kawngpui bakah huan chhunga kawngte endik a ni a.Hemi hnu hian Home Minister Pu R.Lalzirliana chuan huan neitute harsatna zualkai ber kawngpui diaklai leh chhe laite chu siamthat sak a ni ang a ti a. Pu P.C. Lalhriatpuia thlam kang chhia thawm that nan bungrua pe leh in heng huan neitute chu Agriculture mithiamte leh an department thawh theih te chhawr tangkai thiam turin a hrilh a ni. Exodus Rubber Society te hian Rubber plantation a Mizoram tana an hnathawh leh hmalakna tarlang in Soil & Water Conservation leh Agriculture kaihnawih thil a an mamawhte sawrkar hotulu pahnih hnenah hian an lo thlen a ni.

Khamrang rama plantation hmunah hian Pu Lalthanzauva hian huan a nei zau ber a, 100 acre a zauvah Rubber kung lian tawh tak tak 10,000/- leh Oil Palm puitling tawh kung 3,000/- bakah hmunphiah hmun zau tak a enkawl mek a. Pu Lalnunkunga Sailo hian 30 acre a zau plantation ah rubber chingin heng thingkung kar lakah hian lakhuihthei leh balhla a ching tel bawk a ni. Pu P.C. Lalhriatpuia hian Red Oil Palm chiah enkawlin Red Oil Palm kung puitling vek tawh 1,000/- a nei a. Kuthnathawktu member 30 intelkhawm Exodus Rubber Society hian rubber kung 8,000/- phun nung in an nursery siam atangin rubber tiak an hralh chhuak bawk a ni.

Oil palm te hi feet 30 a inhlat a phun a ngaih avangin huan zau tak a mamawh thu Pu R.K. Nithanga, Deputy Director(Oil Palm) chuan a sawi a. A puitlin hma in kum khat chhungin kung pakhat ah a rah vawi 12 seng theih a nih tlangpui thu a sawi a. Oil palm kung pakhat vawikhat rahchhuah, fresh fruit bunch(FFB) hi chawhrualin 25 Kgs. a nih thu leh an chhinchhiah a la rit ber chu 45Kgs. aia rit mah a nih thu Kolasib DAO Pu R.Lalnunzira chuan a sawi a. Heng Oil Palm rah hmin te hi thlai hriak ei chi(edible oil) atana her a nih thin thu leh oil palm rah chhungmu te chu a hran in hriak chi dang tangkai tak, kernel oil atan her leh chhawn a nih thu huan neitute hian an sawi a. Oil palm kung te hi a len hma in sanghal rual laka venhim nan raw-na chang phelsep te tuam a that thu pawh an tarlang bawk a ni. Rubber phun te hi a la puitling lo na in a lian tha tawh hle a, chutih laiin Oil palm phun hmasak te chu an puitling deuh vek tawh a. Oil palm atanga heng huan neitute sum hmuh chu kum khat chhungin Rs.11 lakhs aia tam daih a ni tawh a ni.