No.3850/2021-2022 

Aizawl the 29th Jan., 2022:  Vawiin khan Mizoram Journalist Association, Lunglei District te chuan Annual Conference 2022 Lunglei Press Club-ah hmangin, Agriculture Minister Pu C. Lalrinsanga chu khuallian niin a hmanpui. Pu Zonunsanga Khiangte President MJA Gen. Hqrs chu khualzahawm a ni.

MJA Lunglei District Annual Conference hi Vice President Lalrintluanga Khiangte in a kaihruai a, khuallian Pu C. Lalrinsanga chuan thu sawiin chanchinbumi ten thuziak hlu tak tak an hnutchhiah laiin social media in engemaw chen chu a luahlan lai a awm a, chuti chunga theihtawp chhuah a hma an la la reng chu fakawm a tih thu sawiin mipui harsatna sukiang tura hma la chhunzawm zel tura a duh thu chanchinbu mi kalkhawmte hnenah sawiin  chanchin thar lakkhawm piah lamah mipui sukthlek a tha zawnga kaihhruai a pawimawh thu a sawi bawk a ni. Minister chuan a sawi zelnaah chanchinbu mite chuan thlei bik an neih a thiang lo tih sawiin a tul chuan thil diklo thleng erawh na taka su ngam turin a chah bawk a ni.

MJA General Hqrs. President Pu Zonunsanga Khiangte pawhin thu sawiin chanchinbu mite chu inthlahdah thei anni lo a, sawrkar thil thar te an zir zel a mipuite hnen a puanchhuah kawng a tan lak a ngaih thu sawiin sum leh pai a tuihal tan chuan chanchinbuah an thawk rei peih ngailo a,  chuvangin keini chu mipui rawngbawltu kan ni tih hriain hrehawm tawrh te pawh kan chhel a ngai a ni, a ti. Mizorama MJA te tan pension an buaipui mek thu leh hemi atan hian sawrkarin theihtawp chhuahpui turin a duh thu a sawi lang bawk.

Pu H.Lalthansanga, President MJA Lunglei District pawhin thu a sawi a, Pu V.Rokawlkima Gen. Secy in Lunglei MJA  chanchin leh hmalakna te sawiin, Pu Laltlanthanga Treasurer in sum dinhmun a sawi bawk.

 Tun dinhmunah hian Lunglei ah MJA Member 19 an awm mek a, nitin chhuak chanchinbu 9, kartin chhuak chanchinbu 4 leh Local Cable TV 2 a awm mek a ni.