No.480/2020-2021

Aizawl, the 21st April 2020 : COVID-19 dona kawnga Mizoram  Sawrkar hmalakna zinga pawimawh tak, Task Group on Agriculture Inputs  chuan  an hmalakna leh hmachhawp hrang hrangte chu vawiin khan Agriculture, Co-operation leh Irrigation & Water Resources Minister Pu C. Lalrinsanga hovin  a Office Chamber ah an sawiho.

Meeting ah hian  Agriculture Operation chu uar lehzual zawka kalpui a tul thu te, Chul ram rih dan kawng mumal zawk duan dan tur te, chak taka Mechanization kalpui a nih dan tur te, Sawrkar laipuia thlen nghal tur thu pawimawh chi hrang hrang te, buh leh chaw atana hman theih thlai chin kawnga uar taka hma lak dan tur te leh Vegetable Supply Chain chungchang te sawiho a ni.

Buh leh bal, chaw-a rin theih tura hmalakna uar zawka kalpui a nih theih nan tunah hian Agriculture Minister chuan Mechanization kawng hrang hrang- Power tiller, transplanter, paddy thrasher leh a dangte chu ruamhman mek a nih thu a sawi a. Heng khawl leh hmanruate hi mipui hman theih tura chhawpchhuah leh thuai theih an in beisei thu Minister chuan a sawi. Custom Hiring Centre pawh a rang thei ang bera kalpui chhunzawm an inbeisei thu a sawi bawk.

Minister chuan COVID-19 hripui phenah hian Pathianin malsawmna a thuhruk chu haichhuak tura hma kan lak a tul takzet a ni a ti a. Tunah hian a hnam ang pawhin thlai chin kawnga nasa taka Mizo mipuite kan thanharh avanga lawmawm a tih thu a sawi a ni. 

Agriculture Minitser chuan tuna Kharif atana kan insawrbing lai hian Rabi season atana inpuahchahna kalpui nghal turin member-te a chah a. Minister chuan, “A hun taka che nghal zel thei tura theihtawp kan chhuah zel a tul tak meuh meuh a, Zoram mipuiten ei leh bar kawnga harsatna nasa zawk kan tawh lohna turin Pathian rawn chungin chak takin ke kan pen zel tur a ni” a ti. 

Buh thar tam tura mechanization hmanga uar taka hmalak tum a nih rual hian potential area-a loneitute pawhin phurna thar an mamawh avangin Agriculture Department chuan he lam kawngah hian hma a la dawn a. Tribal Sub Plan hnuaiah kan ram mamawhte chu Agriculture Department-a Research and Extension wing-in buaipuiin KVK leh ATMA te tha chakna hmanga project buaipui nghal a nih thu meeting ah hian report a ni. 

FOCUS project hnuaiah pangbal chinga hmalakna kalpui tan a ni bawk a.  FOCUS District 4(pali) ah hmalakna kalpui a ni ang. Pangbal hi mihring ei atan mai bakah Sericulture Department hnuaia pangang khawite tan pawh a chaw atan a tangkai zui dawn bawk a ni.

Vegetable Supply Chain kalpui dan pawh meeting ah hian sawiho a ni a. Supply Chain Committee chuan Home hrang hrangah te a thlawna thlai an sem theih thu an report a. Hei hi Horticulture Department mai bakah Local leh Village Level Task Force kaltlanga tih a ni.

Thlai chi supply chungchangah Horticulture Department chuan Hybrid ni lovin Open Pollinated Varieties (OPV) chu a that zawk avanga kalpui a nih thu an report a. Thlai chi hi District hrang hranga sem chhuah mek a ni. Sum inremchem a tul avangin thlai chi hi a theih chin chinah theh lova, a tuha tuh ni thei se tih chu Task Group duh dan a ni.

Meeting ah hian Pu Lalhmingthanga, IAS, Chairman, Task Group on Agriculture Inputs hovin member te kokim takin an tel a ni.