85/2022-2023

Dated Serchhip, the 7th April, 2022: Vawiin khan Pu C. Lalrinsanga, Minister, Agriculture, Irrigation & Water Resources, Cooperation, etc., chuan Krishi Vigyan Kendra Serchhip District in N. Vanlaiphaia Ar awpkeuna (Poultry Hatchery) hawnna leh kuthnathawktute tana kalpui zui tlaka an ngaih, hlawhtling taka an enchhin tawh thlai chin dan te leh hnathawh dan phung (approved technology) dahkhawmna lehkhabu a tlangzarh.

He hunah hian Pu C. Lalrinsanga chuan, KVK a thawktute hi loneitute kal zel nana hmahruaitu pawimawh an ni a, an zarah hmasawnna duhawm tak tak kan hmu tam tawh hle a ni. An tangkaizia hriain district thar pathum kan neihah te pawh KVK hi dah thuai kan duh a, kan lehkhate pawh tunah Prime Minister pisaah a awm mek a ni, a ti. Minister chuan, kan ram hi Pathianin mal a sawma, kan thlai chi enchhin hrang hrangte pawh an thar tha thin hlea, Lintel dal kan enchhinte phei chu a thar hlawk lamah ram pum chawhrual aiin kan sang zawk hial a kan phur hle a ni. Vawiinah kan rama chin pun zui theih tura enchhinna neih fel vek tawh thlaite leh a chin dan thlan chhuahte kan tlangzarh thei  leh  KVK Serchhip district ten an remhriatna leh inpeknaa an din Ar awpkeuna khawl thar kan hawng hi a lawmawm hle a. Heng lai vela Ar vulhtute tan a tangkai hle dawn a ni, a ti. Minister chuan kan ei bar mamawhte tam zawk leh felfai zawka kan thar chhuah theih nan sawrkar chuan Land Leasing Act te, Collective Farming System te a ngaihtuah chho zel a, FOCUS hmalakna hmangin awmze nei zawka buh leh bal thar chunga kan leilung leh ramngaw venhim hna pawh thawh mek zel a ni. KVK Scientist te chu kan kuthnathawktute tana an pawimawhzia inhriaa theihtawp lo chhuah zel turin a chah a ni. Minister hian N. Vanlaiphai khawtlang hruaituten loneitute mamawh chi hrang hrang an lo dilte chu a theih chin chin ngaihtuah sak an nih tur thu a hrilh bawk.

Vawiina Minister-in Ar awpkeuna a hawnah hian a rualin Artui 500 a awpkeu tir theih a, approved technology tlangzarh takah hian thlai leh a chin dan thlan chhuah 38 a awm a ni.

Minister hi Pu James Lalsiamliana, Director, Agriculture te leh official pawimawh dangten an tawiawm a, N. Vanlaiphaiah hian Pu H. Lalhruaitluanga, SDO Civil leh Dr. T. Vanlalngurzauva, Senior Scientist & Head leh a thawhpuiten an lo dawngsawng a ni.


Attachment

  • Loading attachment...