Nimin khan Agriculture Minister Pu R. Lalzirliana chuan Champhai District-a NLUP 2nd Phase hnuaia WRC-I leh WRC-II beneficiary 1196 hnenah tanpuina a sem a. Champhai Agriculture Complex-a DAO quarter a hawn bakah SDAO Quarter thar sak chu Champhai North bialtu MLA, Parliamentary Secretary Pu TT Zothansanga'n a hawng bawk a ni.

NLUP tanpuina semna hun hi Champhai Venglai Community Hall-ah neih niin, Champhai DC Pu Vanlalngaihsaka chuan hun hi a kaihruai a. Khuallian Minister Pu R. Lalzirliana chuan NLUP Phase hmasa a dawng zingah tha taka lo hmang te chuan hlawkna an tel tawh thu sawiin, Sorkar laipuiin inrenchem a uar chhoh zel avangin engkim a Sorkar tanpuina beisei chu a remlo a ni, a ti a. Kan theih tawkah taimakna leh tumruhna nen hlawhtlin tuma kan beih ve a ngai ani, tiin beneficiary-te chu duhsakna a hlan a.

Sorkar thawhpui kawngah Agriculture Minister chuan Sorkar tawiawm chu mipuite tih tur a nih rualin hmalakna thenkhatah mipuite hriatthiam dan nen a inmil lo pawh awm thei a nih thu leh, chutiang thil a thleng a nih pawhin engkim hi tha taka sawifel theih a ni tih hria a, sawisel hmasa lo a sawifel tum hmasak zel chu kalphung duhawm zawk a ni, a ti.

Khualzahawm Parliamentary Secretary Pu TT Zothansanga chuan NLUP beneficiary-te chu an taimak thlah lovin, an chhungkua mai bakah khua leh ram tana an hna thlan chu thawk zel turin a chah bawk a. Hunpui hnaih a tanpuina dawng an nih avangin a hmanna tur bakah chuan hmanglo tur fimkhur turin beneficiary-te chu a chah bawk a ni.

NLUP semna hunah hian Agriculture Director Dr. C. Lalzarliana pawhin thu sawiin, mipuii eizawnna ngelnghet an neih theih nan Sorkarin puihna tha tak tak a chhawpchhuak thin a. A hamthatna dawngtute zingah tha lo thlah an awm leh hlauh thin erawh pawi a tih thu sawiin, Sorkarin a tawp rat thleng a pui vek dawn lo tih hria a, mipuiin kan thawh ve tur chin chu hre turin beneficiary-te chu a chah a ni.

NLUP tanpuina sem programme-ah hian Pu RK. Nithanga, DAO hnen atangin report ngaihthlak a ni a, Pu B. Lalhmuchhuaka, SDAO chuan lawmthu sawiin hun tawpna a siam a ni.

NLUP tanpuina dawngtute hi khua 91 ami te niin, WRC-I beneficiary-te chu Phase II tanpuina hi pek tlak vek niin, WRC-II ah erawh la dawng tur an la awm a. Agriculture Department hnuaiah hian trade pathum - WRC-I, WRC-II leh Fu (Sugarcane) chin awmin, Champhai District ah hian Phase-I hnuaiah beneficiary 920, Phase II ah beneficiary 1231 thlanchhuah an ni a. Phase III atan khaw 87 atangin chhungkaw 766 thlan chhuah niin, Rs. 10,000 theih sem an ni tawh a, Phase IV atan khua 83 atangin chhungkaw 359 thlanchhuah an ni a, Rs. 10,000 tanpuina pek an ni tawh bawk.

Agriculture Complex-a quarter pahnih hawn te hi RKVY atanga sum hmuh a sak niin, DAO Quarter sak nan hian cheng nuai 20 sen a ni a, SDAO Quarter sak nan hian cheng nuai 15 sen a ni thung.

Attachment

  • Loading attachment...