Nimin khan Pu H.Liansailova, Agriculture Minister chuan MIFCO Food Park a Sapthei tui an siam chhuahna hmun leh Sapthei kawr fe hmanga Agriculture Department ten leitha an siam chhuahna hmun Fruits and Vegetables Waste Compost Production Unit, Chhingchhip te chu a hmun ngeiah a tlawh.

Agriculture Department hmalakna in Chhingchhip ram chhunga MIFCO ten Sapthei an sawr tawhna fe “ a kawr” te chu leitha (Compost) siam nan a tangkai a ni tih hria in, Fruits and Vegetables Waste Compost Production Unit nikum -2008 khan din a ni a. Agriculture Minister Pu H.Liansailova chuan a hmun ngeiah kalin hnathawktute hnathawh dan a enpui. He leitha siamna hmun ah hian leitha siam chhuahna tur raw material a tam tham avangin he hmun hi changtlung zawka ruahmanna fel tak nen hmalak chhunzawm zel tur a ni a ti. He hmun a leitha (Compost) tam tak siam chhuah a nih hunah phei chuan vairam atanga pawisa tam tak senga Compost kan lei thin hi a hniam phah hle a beisei awm a ni.

Leitha siamna hmun a tlawh hnuah MIFCO, Food Park hmun a Sapthei tui sawrna hmun a tlawh kual leh a, hnathawktute hna thawh dan ropui a ti in, he hmun a kuthnathawktute thar chhuah Sapthei, Lakhuihthei, leh adangte an lo lei sak thin hi hmasawnna ropui tak a ni a ti. Tan la zel turin a fuih nghal a ni.

Hemi ni vek hian Serchhip Mat Kam Vegetables Growers Association Assembly a hman pui nghal a. He loneitu intawhkhawmna ah hian mi 200 bawr vel an kal a, Serchhip DC Pu H. Darzika’n Agriculture Minister tawiawm in kalkhawmte hnenah fuihna thu a sawi a. Serchhip DC in hun a hman zawh hian, Agriculture Minister Pu H.Liansailova chuan loneitu kalkhawm te hnenah ei leh bar intodelhna tur kawnga taima taka ke an lo penna ah lawmthu a hrilh a, hun lo la kal zel turah pawh kan leilung tha taka humhalh chungin rinawm taka Pathian tih chungin hma la zel turin a fuih.

Minister hi Minor Irrigation S.E, Pu Laldingliana leh Agriculture Department atangin Pu Tlangtimawia Zote, Subject Matter Specialist te’n an tawiawm.