1312/2022-2023
Aizawl the 21st July, 2022 : Vawiin khan Agriculture Minister Pu C.Lalrinsanga chuan Sub-Mission on Agricultural Mechanization hnuaia Agricultural Machineries and Implementation for Custom Hiring Centre atan Tractor vailiamna hun Silaimual-ah a hmang.

Agriculture Minister Pu C. Lalrinsanga chuan leilet neituten an inhmantawm tur- tractor leh leilehna hmanrua pekchhuahna leh vailiamna programme buatsaih a ni thei chu lawmawm a ti a. Agricultural Mechanization hi na zawka kalpui chu sawrkar tum niin, leilung hmanga tharchhuah a tam zel theihnan, vawiina tractor dawngtu- loneitu intelkhawm te chuan tangkai taka khawl an hman a, neitu chan chang thiam a, neitu bik awmlo-in an member tin ten a tul atan an hmang thei theuh tur a ni a, mimal pumbilh bik an awm anih chuan Department hotute nen agreement an sign hnan milin hma an la ang tiin a sawi a. Sawrkarin theihtawp a chhuah angin loneituten theihtawp an chhuah tur a ni a, Serchhip District ah FOCUS leh RKVY kaltlangin ranchaw herna khawl chu Tlungvel leh Haulawng tlangdung ten an hmang tangkai hle a ni tih sawiin thawhrimna leh tumna hian hmalam min pan tir a ni tih hretharin, rilru thar, thinlung thar nena hna thawk turin a sawm a.

Minister chuan loneitute rilruah hlawhtlinna duh a mahni sum senga pen chhuak vawiin ni-ah an lokal khawm chu an chungah lawmthu sawiin, thinlung thar nen rahbi thar kaiin, kan ram hi a dingchhuak tur a ni tih rilru pu a thawk turin a chah a. Rabi Season chhungin Pulse Production a tam theih nan hmalak mek a ni a, mipui tam zawk leh harsa zawk te pawn hriselna atana pawimawh protein tamna pulse chu man tlawm zawka an leih theihnan he hmalakna hi bul tan a ni a ti a. Aeroponics hmangin Alu thar chhuahna tur Thingdawlah kalpui mek a ni a, Falkawn-ah Bekang hriak herna khawl bun mek niin, thlai thar chhuah dah thatnan Solar Cold Storage buaipui mek a ni tih a tarlang a.

Minister chuan thlai thar a pun nan khawl hman fo a ngai a ni tih a chiangreng a, vawiina tractor dawngtu tur te hian tangkai tak leh hlawk pui taka an hman theihnan duhsakna a hlan a ni.

Tractors leh leilehna hmanruate hi Mizoram hmun hrang hranga loneitu intelkhawm 25 te hnenah pekchhuah tum a ni a, vawiin hian tractor 6 vailiam a ni a. Loneitu group khat zelah khawl leina tur hian Central leh State sawrkar tang kawlin Rs. 9.50 lakh (90:10 sharing) zelin tanpuina a pe a. Hemi bak hi loneituten an tum a, an tractor lak duh a zirin an chawibelh zan erawh a in anglo thung a ni. Tun dinhmunah hian Custom Hiring Centre 233 din tawh a ni a, tractor leh leilehna hmanrua hi tun dinhmunah a vaiin 258 pek chhuah tawh a ni.