Mizoram Upa Pawl, Durtlang Branch chuan vawiin khan M.C. Hall Auditorium, Durtlangah kumtin intawhkhawmna hun "Annual Meeting" an buatsaih a, he hun hi Agriculture Minister Pu C Lalrinsanga chuan khuallian niin a hmanpui a, Aizawl Municipal Corporation Deputy Mayor Pu Lalringliana chu khualzahawm a ni.

He hun hmanpuitu khuallian Pu C. Lalrinsanga chuan upate chu Mizoram tan an hlu em em a ni a ti a, upate chu an tu leh fate tan malsawmna an ni thin a ni tih hre reng se a duh thu sawiin, an thatlai hun a an thil tawn pawimawh tak tak an la hriatte chu ziaka chhinchhiah dan awm thei se a duh thu a sawi a, ram leh hnam rohlu tak a la ni dawn a, zirlai leh mithiam ten an la rawn zir duh dawn a ni, tiin hetianga a beiseina an tihlawhtling thei dawn a nih phawt chuan an mamawh tul zawng zawng a ngaihtuah sak dawn bakah a ziaktu zawng zawng lawmman pek a inhuam thu a sawi a ni.

Minister chuan Durtlang chu organic farming lama hma la tha an ni tih sawiin a khaw mipui awmzat thlira kum upa la chak tha tak tak an tam hian thildang vang awm thei mahse thlai hrisel leh him an tharchhuah an ei that vang a nih a rin thu a sawi a, rampumah pawh entawntlak an ni a ti a, organic farming uar deuh deuh turin sawrkarin theihtawp chhuahin hma a la mek a ni, a ti. Kan rama thlai kan tharchhuah theih chi hrang hrang rampawn lam atanga kan lakluhte hi Mizoram chhung ngei a tharchhuak turin Agriculture department in tan a la mek a, loneitute nen tan kan lak tlan a kan thawhho a pawimawh hle a ni a ti a. Durtlang loneituten an chhawr tangkai theih turin link-road laih sak thuai an nih tur thu a sawi bawk.

Khualzahawm Pu Lalringliana, Deputy Mayor, AMC pawhin thu sawiin bawlhhlawh paih kawngah leh faina kawnga Durtlang mipuite hmalakna fakawm a tih thu a sawi a, khawtlang mipuite nen thawhhona tha an nei thin chu lawmawm a tih thu sawiin bialtu Councillor a nih ang pawhin theihtawp chhuaha hma a lak zel tur thu a sawi a, Aizawl City bus service in a huam ve tawh tur chu a lawmpui thu a sawi bawk. Upate chu mizo nun zemawi leh pi leh pute ngaihhlut thil vawng nung a min zirtirtu pawimawh tak an ni a ti a, an tawnhriat te chu ram leh hnam rohlu a ni tiin tlawmngai pawl leh khawtlang hruaitute pawh an thiltihna ah upate thu leh hla ngaichang thin turin a chah a ni.

MUP Durtlang branch ah hian tun dinhmunah member 349 (mipa 139, hmeichhia 210) an awm mek a, heng zingah hian Life Member 94, Patron 10, Chief Patron 14 awmin, kum 85 chunglam 25, kum 80-85 hi 54 an awm a ni. Tar chawmna (Old-Age pension) dawng mi 22 an awm a, hmeithai tanpuina dawng 5 awmin rualbanlo tanpuina dawng 4 an awm a ni. Tunah hian bialtu MLA fund atangin upate inkawmkhawmna tur "recreation hall" an sa mek a, an branch chhungah hian section 19 an nei a ni.

Kum kalta chhungin an member 19 (mipa 12, hmeichhia 7) an boral a, heng an member boralte sun nan hian darkhuang vawi 7 vuak niin hemi chhung hian ngawin rengin kalkhawmte hi an ding a ni.

MUP, Durtlang branch te hi khuallian leh khualzahawmte hian duhsakna thilpek an hlan a, khuallian hian Rs. 15000/-, khualzahawmin Rs. 8000/- an hlan a ni.

Vawiin hun hi Pu Thanchhunga, President, MUP Durtlang Branch-in a kaihruai a, Vice-President, MUP, Aizawl North-I Area Pu P.C. Doliana'n inlawmna thu sawiin, branch hruaituten hmalakna report chi hrang hrang an pek bakah Durtlanga tlawmngai pawl hrang hrang aiawhten thu an sawi a ni.