1355/2024-2025

Dated Kolasib the 29th July, 2024: Vawiin tlai dar 3 khan Pu PC. Vanlalruata Hon'ble Minister Agriculture etc. chuan Fostering Climate Resilient Upland Farming System In The North East (FOCUS) District Management Unit, Kolasib District hnuaia Innovation Fund hmanga Ruattei Fish Seed Farm N. Chawnpuia Cheng Rs 30,08,000.00 senga Sangha chaw siamna khawl din chu a hawng a, Pu Robert C Lalhmangaiha DC Kolasib chu Khualzahawm a ni.

Lalengzami Haulai State Project Director IFAD-FOCUS kaihhruaiah hian Agriculture Minister chuan hetianga sangha chi siamna hlawhtling tak mai, puih tlak an awm chu lawmawm a tih thu sawiin, kuthnathawktu zingah sawrkarin an bana kaih zeuha hlawhtlinna chang thei an awm nual a, a zavai chuan theilo mah ila a theih chin chinah kan inkaichhuak zel dawn a ni a ti a. Mizoramah chuan kan eizawnna pui ber chu Agriculture sector a nih avangin kuthnathawktute chawikan zel hi sawrkar chuan a tum a  ni a ti bawk. He khawl hian sangha chaw mai bakah vawk chaw leh thil dang dang a siam chhuak thei dawn a, chu chu kuthnathawktute nasa takin a zar an zo thei dawn tih sawiin, hlawhtling taka kal zel turin duhsakna a hlan a ni.

He hunah hian Khualzahawm Pu Robert C.Lalhmangaiha, Kolasib DC bakah Ruattei Fish Seed Farm Innovation Fund Awardee Pu Seltawnan thu an sawi bawk a, Dr.Lalrotluanga Sailo Deputy Director (Vety) PMU, FOCUS Mizoramin technical report a pe bawk a ni.