Nimin January ni 31,2020 khan Pu C.Lalrinsanga Agriculture Minister chuan mission Organic Value Chain Development for North Eastern Region (MOVCD-NER) scheme hnuaia Lunglei  Organic Ginger Producer Society in sawhthing an thar chhuah  Metric Ton 40 chu Haulawng atangin a vailiam.

He hun Pu Lalhmingthanga, Commissioner & Secretary, Agriculture Department kaihhruaiah Minister chuan Lunglei Organic Ginger Producer Society te hmalakna fakawm a tih thu a sawi a. Kan buh leh thlai enkawl naah chemical fertilizer leh hlo thahna damdawite kan hmang uar lutuk chu a vei takzet thu sawiin hengte hian kan leilung leh boruak a tih chhiat mai bakah mipuite hriselna thui takin a nghawng a ni, a ti a. Ram changkang zawkte tih dan leh mipui hriselna atana pawimawh tak ‘Organic Farming’ Mizoramah uar taka kalpui tum a nih thu a sawi a ni.

Lunglei Organic Ginger Producer Society hian Kum 2017 atangin MOVCD-NER Scheme hnuaiah hian Organic Farming-ah hma la in tunah hian khua 13 ah ram hectare 679 a zauvah chhungkua 646 in hma an la mek a, Kum 2018-19 chhung khan sawhthing Ton 400 chuang tharchhuakin farmer ten an sum hmuh belhkhawm hi Rs Nuai 150 chuang niin chhut a ni.

MOVCD-NER scheme hi kum 2016 ah Central Sorkarin India hmarchhak State 8 te tan a ruahman a, Kuthnathawktuten kumtin lo vata kham khawp ngawr ngawr an thar thin chu hlawk zawk leh awmze nei zawk a Organic farming hmanga hlawk zawka an thar chhuahte an hralh a sum lakluhna tha zawk an neih theih nan an ruahman a ni. Tunah hian Mizoram ah kuthnathawktu intelkhawm (Farmer Producer Company) 14 dinpui tawhin ram hectare 13,000 a zau ah farmer 14,104 ten ram hlawm hrang hrangah hian thlai thlan bik hmangin farmer ten theihtawp in hma an la mek a, Kumin chhung hian Organic Certificate an nei theih beisei niin an tharchhuah te chu Organic India Logo chuan tirin awmze nei takin sumdawnna an kalpui thei tawh dawn a ni.

Tunah hian Lunglei Organic Ginger Producer Society hian AGA Organic Industries te nen agreement siamin a thawh khatna atan Sawhthing Ton 100 an hralhchhuak phawt ang a, hralhchhuah tur an neih dan a zirin rate fel tak siamin an hralh leh zel dawn a ni.

Attachment

  • Loading attachment...