1204/2024-2025

Aizawl, the 18th July, 2024:  Mission Organic Mizoram (MOM) leh Clover Organic Pvt. Ltd. te bultum, Mission Organic Value Chain Development for North Eastern Region (MOVCD- NER) kaltlanga Khawzawl District chhunga lakhuihthei chingtu intelkhawm pawl -  Tuichangral Organic Farmer Producer Company Ltd. te lakhuithei thar zawrh chhuah runpui 'Pineapple Bonanza 2024', Millennium Centre kawtzawla buatsaih chu vawiin chawhma dar 10:00 khan Agriculture & Farmers Welfare Minister Pu PC Vanlalruata'n a hawng.

Khuallian Pu PC Vanlalruata chuan chemical tel lo organic lakhuihthei zawrh chhuah runpui Pineapple Bonanza tum thum lai buatsaih a ni ta chu lawmawm a tih thu sawiin, a hlawhtlin theih nana hmalatute fakawm a ti a. Organic farming kalpui nan sawrkar laipuiin chak taka hma a lak dante tarlangin, North East State tan kum 2013 atangin MOVCD-NER kalpui a ni a, Mizoramah kum 2016 atangin Mission Organic Mizoram kalpui niin, a hlawhtlinna pawh hmuh chhoh mek zel a ni, a ti a. Farmer Producer Company (FPC) hnuaiah loneitu 500 tal awm tura ruahman a nih thu leh heng zinga mi Tuichangral FPC te'n chak taka hma an la chu chhuanawm a tih thu sawiin, Mission Organic Mizoram kaltlangin tuna hmalak mekna mizo hmarchate, sawhthing, aieng, thingpuife leh lakhuihtheite bakah  Mizoram thar sapthei chu a danglam bik avang leh India ramah ching an tam loh avangin CM duhdanin MOM hnuaia hmalakna turin telh belh tum a ni, a ti bawk.

Agriculture & Farmers Welfare Minister chuan market tel lo production ringawt hmangin thui tak a kal theih loh avangin marketing lam leh farmer-te awmze nei leh mumal zawka thlunzawm tum a ni tiin, a hlawhtlin theih chuan agriculture-ah hmasawnna inlumlet a awm thei dawn a ni, a ti a. Sawrkar tharin agriculture marketing a ngaihpawimawh em avangin Directorate of Agriculture-ah Marketing Wing changtlung zawk din tura hmalak chhoh mek a ni, a ti a. Mizoram Agriculture & Allied Marketing Board kalpui chhoh mek a nih thu pawh a tarlang a. Mission Organic Mizoram hlawhtlinna hmel hmuh a nih theih nana Agriculture Department hotute leh thawktu dangte bakah FPC enkawltu Clover Organic Pvt. Ltd. leh service provider-te hmalakna chhuanawm tiin theihtawp chhuah chhunzawm zel turin a chah a. Khawvelin chemical tel lova enkawl thlaite a ngaihhlut thu leh khawvel hmasawn zelah hrisel nan ei leh in duh uluk a tul tih sawiin, mipuite chu organic thlaite ngaisanga ei tam turin a fuih a. Mission Organic lama thanharh angaih thu sawiin, hei hian market tha zawkah min hruai thleng thei dawn a ni, a ti a. Farmer-te chu hmasawnna rahbi thar rap thei tura inbuatsaiha theihtawp chhuaha hna thawk zel turin a chah a. Mipuite chu pineapple bonanza buatsaih chu ngaihlua dawr theuh turin a sawm nghal bawk.

Pineapple Bonanza 2024 hawnna programme hi Pi Lalengzami Haolai, Jt. Director, Agriculture Department chuan kaihruaiin Pu Vanlalremruatpuia, CEO, Tuichangral Organic FPC Ltd. hnen atangin technical report ngaihthlak a ni a. Pi H. Zodinpuii, Dy. Director, Agriculture Department & State Coordinator, Mission Organic Mizoram-in lawmthu sawiin hun hman a khar a ni. 

Tuichangral Organic Farmer Producer Company Ltd. hi Mission Organic Value Chain Development for North Eastern Region (MOVCD- NER) hnuaia loneitu intelkhawm pawl Farmer Producer Company (FPC) niin, August ni 16, 2021 ah MOVCD- NER Phase lIl (three) hnuaia din a ni a. MOVCD- NER hi State Lead Agency - Mission Organic Mizoram (MOM), Directorate of Agriculture enkawl niin, Mizoram chhungah FPC 30 ziah luh tawh an ni a, FPC tinte hian thlai thlan bik Mizo hmarchate (Bird's Eye Chilli), sawhthing, aieng, thingpuife leh lakhuihthei te an nei a. Tuichangral FPC te hi Khawzawl District chhunga lakhuihthei ching mi 500 intelkhawm niin, Khawhaiah registered office neiin, Board of Directors member 10 in an thutchilh bakah Chief Executive Officer-in a enkawl mek a. Tuichangral FPC ah hian Khawzawl District chhunga lakhuihthei chingtu khaw pariat - Chalrang, New Chalrang, Vangtlang, Khawhai, Sialhawk, Tlangmawi, Tlangpui leh Lungtan te an tel a ni.

Pineapple Bonanza hi August 2022 atang khan MOVCD- NER hnuaia Mizoram chhunga Service Provider - Clover Organic Pvt. Ltd. te hmalakna hnuaia hman tan niin, State Lead Agency - Mission Organic Mizoram, Agriculture Department nena tangkawpin kum tin neih chhunzawm a ni ta a. Tun hi a tum thumna niin,  July ni 26, 2024 thleng a awh ang. Hemi hun chhung hian lakhuithei metric tonne riat (8) tal hralh chhuah theih beisei a ni a. Khawzawl DC leh DHO Office, Khawzawl District te'n Aizawla rawn phurh thlakna tur an ruahman sak a ni.

Tuichangral FPC te lakhuihthei chin hi Giant Kew variety niin, heng lakhuihthei te hi organic (chemical tel lo) a enkawl organic certification nei thlap an ni a. Mission Organic Mizoram leh Clover Organic Pvt. Ltd. te hmalakpuinain  Mizoram chhung mai bakah State pawn lam thlengin lakhuihthei an hralh chhuak tawh thin a. Kum 2022 khan Haryana-a Surifresh Extract Pvt. Ltd. te hnenah lakhuihthei metric tonne 18 lai an hralh mai bakah Mumbai-ah metric tonne 2.6 an hralh chhuak bawk a. Mizo thar lakhuihthei a tam thei ang ber Mizoram pawna hralh chhuah a nih leh theih nan hma an la chhunzawm mek bawk. Tuichangral Organic Farmer Producer Company Ltd. chuan 'Pineapple Bonanza' hlawhtling taka hman a nih leh theih nan hlutsaka chhim theuh turin mipuite an sawm a ni.