Vawiin chawhma khan Ch. Saprawnga Truck Terminal, Rangvamualah Minister of Agriculture, Cooperation etc. Pu C. Lalrinsanga chuan ram pawna sawhthing zawrh tur a vailiam a. Mizoram Agriculture Marketing Solution (MAMSol) enkawlna hnuaiah kumin chhung atana sawhthing thawnchhuah hmasa ber a ni.

Minister Pu C. Lalrinsanga chuan Mizoram Cooperative Apex Bank Ltd. ten kuthnathawktute hamthatna atana an hmalakna chu ropui a tih thu a sawi a. Kuthnathawktute tana dinchhuahna kawngah hmalakna pawimawh tak a nih thu a sawi a. Heng sawhthingte hi Mizoram hmun hrang hrang atanga dahkhawm an nih hnuin ram pawnah a rang lama thawnchhuah thin an ni, a ti a. Kan rama thlai kan chin thinte hi ruahmanna fel tak nena kan thawhchhuahpui a ngai a, thing leh mau bakah kan leilung tichhe zawng lova hnathawh a, thangtharte tana ram tha kan hnutchhiah a pawimawh a ni, a ti a. An kal zelna turah duhsakna a hlan nghal a ni. 

Mizoram Agriculture Marketing Solution (MAMSol) hi kum 2016 khan din a ni a. Mizoram Cooperative Apex Bank Ltd. hmalakna a Mizoram thlai tharchhuah kuthnathawk ten hlawk zawka an hralh theih nana partnership firm a ni a. Mizoram hmun hrang hrang atangin sawhthing an leikhawm a, ram pawn sumdawngte dawrin an hralh leh thin a, kum 2018 chhung khan sawhthing leina atan cheng nuai 167 an hmang a. Sawhthing leina zat pawh hi market dinhmun a zirin a danglam thin a ni. Kumin atana sawhthing leisa dahkhawlna atan sawrkarin rem a tihpui angin Ch. Saprawnga Truck Terminal an hmang a. Tun tumah hian company pakhat Patel & Co. nen inthlunzawmin Siliguri-ah thawnchhuah a ni.

Programme hi Mizoram Cooperative Apex Bank Ltd Chairman Pi T. Lalmuanpuii chuan a kaihruai a. Mizoram Cooperative Apex Bank Ltd hotute, Horticulture Department hotute, MAMSol hnathawkte an tel kim hle a. Hrechiang duh tan 8794529935/9856892380 leh mamsol1216@gmail.com ah MAMSol hi biaktheih an ni.