Vawiin khan Agriculture Minister Pu KS Thanga chuan a bial chhung Sateek khuaah Government Sateek High School Science Laboratory building thar a hawng.

Pu KS Thanga chuan ram hruaitu tha, dik leh inpe nei thei turin mipui tha, dik leh inpe kan nih a tul, a ti. Science Laboratory hawnna inkhawma kal Sateek khawtlang hruaitute chu fuihin hmasawn tur chuan kan rilru ngaihtuahna in hma a sawn a tul a, keimahni hi ropui tura kan inngaih loh chuan engtikah mah kan ropui thei lo ang, a ti a. Pathian hian tute mah hi rethei reng turin min siam lo, mahni ngei thawk chhuakin, rinawmna leh taimakna nen kan beih phawt chuan Pathianin min hruai chhuak ang, tiin Minister chuan a bial mipuite a fuih a ni. Sateek High School in an mamawh tak Science Laboratory building thar an nei chu lawmawm a tih thu sawiin zirlai leh zirtirtuten tangkai taka an hman ngei a beisei a ni.

Govt. Sateek High Science Laboratory building hi kumin March thla khan sak tan a ni a, building sak nana an sum hmuh zat chu cheng 5,34,000 a ni.  Hawnna inkhawm hi an Headmaster Pi Laltlanthangi’n a kaihruai a. Pu B Rodingliana’n technical report a pe a, Pu Lalngaihawma’n lawmthu sawiin hun hnung a khar a ni. Science Laboratory building hawnna inkhawmah hian Sateek khawtlang hruaitute leh tlawmngai pawl hrang hrang hruaitute an tel a ni.