Agriculture, Irrigation & Water Resources leh Cooperation changtu Minister Pu. C. Lalrinsanga chuan vawiin ( 17.10.2019) chawhma lam khan Mizoram mamawh te thlen in Delhi ah Sawrkar laipui-a mi pawimawh tak tak te a dawr chhunzawm a.

Vawiin khan Pu Sanjay Agarwal, Secretary to the Govt of India, Agriculture, Cooperation and Farmers’ Welfare nen meeting pawimawh tak an nei dun a. Minister chuan Agriculture leh Cooperation lama Mizoram sawrkarin hmachhawp a neih te, kan harsatna leh  mamawh kan neih te chipchiar takin a sawipui a.    Secretary Pu Agarwal chuan Agriculture leh a kaihhnawihah North Eastern state-te tan sum leh pai lama Sawrkar laipui a inhuamzia Minister hi a lo hrilh. Tuna Agriculture Scheme hrang hrang hnuaia sawrkar laipuiin Agriculture and allied sector-a Mizoram tana sum a rawn pek tawh ang angte rang taka hmang tur leh hman dan mumal taka report thehlut tura Sawrkar laipuiin min beisei thu te bakah sum hman chak a nih chuan installment lo kal leh tur rang taka rawn pek leh an duh thu te Secretary chuan a lo hrilh a. Central Sector Scheme leh Centrally Sponsored Scheme chhungah Mizoram tana Additional-a GBS hman tangkaipui thei kan nih thu te Secretary chuan Minister hi a lo hrilh bawk a ni.

Pu C Lalrinsanga chuan Oil Palm chingtute tana Minimum Support Price sang zawk Mizoramin a mamawh thu pawh a sawipui a. He thu hi Pu Agarwal chuan Union Agriculture Minister Pu Narendra Singh Tomar zin a lo haw veleh a lo sawipui nghal tur thu a lo hrilh bawk a ni.

Agriculture Minister hian Agriculture Management Technology Agency (ATMA) leh SAMETI chungchang Mizoram dinhmun pawh Secretary hi a sawipui a. Secretary chuan heng project ahte hian Mizoramin sum kan hman chak dan a zira a dang rawn pe tur a nih thu lo hrilh bawk a ni.

Minister chuan Agriculture leh a kaihhnawihah te Mizoramin Scheme kan bawhzui that thu te leh Sawrkar laipui pawh sum pek kawnga ke pen rang tura a beisei thu hrilhin Agriculture Secretary chuan Sawrkar laipui pawh a inhawn zau thu a lo hrilh bawk a ni.

Agriculture Minister hi naktuk thleng Delhi-ah la chamin Sawrkar laipui mi pawimawh tak tak te a la hmu kual ang a. Vawiin ( 17/10/2019) tlaiah hian FOCUS project chungchanga UN-IFAD lam mi pawimawh te  a kawm leh nghal dawn a ni.