2447/2022-2023
Aizawl, the 27th October 2022: Vawiin khan Agriculture Minister Pu C Lalrinsanga hovin Sub-Committee on Draft Mizoram River Protection Bill chu a pisaah an thukhawm. He Sub-Committee hian Mizoram chhunga lui humhalh na tur dan duan chhin an enho a ni.

Minister Pu C Lalrinsanga chuan Mizoram chhunga lui kan neih te humhalhna tur dan duan mek chu vawiina mite chauh ni lo, nakin zela thangthar lo la awm tur te tana ram nuam siamna tur atan a pawimawh em em a ni, a ti a. A humhalh leh vawn thianghlim bakah kan tui neihsa a kiam zel lohna atana humhim leh tihpun dan ngaihtuah a tul a ni a ti a. Mihring damkhaw chhuahna atana a loa awm theihloh, tui hi nakin thlenga hnianghnara kan neih theih nan he dan hi a pawimawh hle dawn a ni, a ti.

The Mizoram (Protection of Rivers) Bill, 2022 duang tur hian Deputy Chief Minister Pu Tawnluia hnuaiah Committee sang din a ni a. He Committee sang hian he dan thar ruangam siama, duang chhin turin Agriculture Minister kaihhruaina hnuaiah Sub Committee a din a. Chu Sub-Committee chuan dan lam thiamte kaihhruaiin Working Group a din a. Working Group ten draft an buatsaih chu enho a nih hnuah line department zawng zawngah thawnchhuah a ni a. Line Department te hian he dan hi chipchiar taka zirchiangin an ngaihdan leh rawtna te Sub-Committee ah ziakin an thlen a. Vawiin meeting hian heng an rawtna te hi uluk taka enhoin, siamthat ngai lai te siamthain belh ngai te an belh a ni.

Sub-Committee on Draft Mizoram River Protection Bill hian he draft bill hi an enho hnuah Deputy Chief Minister kaihhruai Committee ah an thlen leh ang. Pawm a nih chuan Cabinet ngaihtuah turin chhawpchhuah a ni ang a, Cabinet in a pawm chuan Mizoram Legislative Assembly ah putluh a ni ang.