No.3115/2021-2022

Aizawl, the 23^rd November 2021 : Vawiin khan Agriculture Minister Pu C. Lalrinsanga chuan Food Corporation of India, Divisional Office Aizawl in nakuma zalenna champha 75-na lo thleng tur atana Sawrkar Laipui in a lawmna a kalpui mek Azadi Ka Amrit Mahotsav hnuaia ‘Celebration of Iconic Week’, programme tawi Aijal Club ah an buatsaih chu a hmanpui a. Aizawl Mayor Pu Lalrinrenga Sailo pawhin he programme hi a hmanpui a ni.

Pu C. Lalrinsanga chuan ram in zalenna a neih champha 75-na lawmna tia hriat lar Azadi Ka Amrit Mahotsav chu programme huamzau tak leh ropui tak nia a hriat thu sawiin he hun pawimawh hi kan chuangkai mek a, programme hrang hrang te, hemi pualin buatsaih chhoh mek a ni a, mi tinin enge a awmzia tih hi kan hriat a tul a, kan ngaihlut thiam a pawimawh bawk a ni, a ti. FCI chu ramin hmasawnna ke a penna kawnga, Sawrkar hmalakna te tihlawhtlingtu leh a tiphuisuitu, peng pawimawh, Corporation lian tak ni chungin India mipuite chawma hraitu ber an nihna te hi a chhuanawm hle nia a hriat thu a sawi. Minister chuan FCI hmalakna dante sawiin mipuite tana an rawngbawlna, buhfai sem tur ruahman leh loneitu te tana an hnathawh, an tharchhuah te leisak hi a chhenfakawm a, khawvela loneitute tharchhuah leisaktu lian berte zinga ami an nih a rinthu a sawi a ni.

Aizawl Mayor Pu Larinenga Sailo pawhin thu sawiin FCI hotute chu Aizawl khawpui tihchangtlunna kawngah an theihna apianga thawhpuiah sawmin faina leh thianghlimna te, khawpui tih en te leh khawipui cheibawl chu AMC in a ngaihpawimawh hmasak mekte a nih thu a sawi.

FCI, Divisional Office Aizawl mawhrphurhna la mektu, Pi Zodinpuii Ralte chuan FCI in ram pum leh Mizoram a hma a lak dante presentation hmangin a tarlang a. State tam tak ten FCI in buhfai a pek(allot) te chu an lak seng vek loh laia Mizoram in allotment an la vek thei chu lawmawm a tih thu a sawi lang bawk a ni.

FCI hian Mizoram pumah Food Storage Depot (FSD) 6 nei mekin 2 dang Sairang leh Khawzawl ah te ruahman mek a ni. Prime Minister in COVID hripui avanga mipuiten ei leh bar lamah an zangkhaina atana a thlawna buhfai sem a ruahman – PMGKAY hnuaiah beneficiaries, mi vaibelchhe 80 te hnenah buhfai/wheat kg 5 zelin FCI kaltlangin National Food Security Act hnuaiah ruahman a ni a, hemi atana hian Sawrkar Laipuiin cheng vaibelchhia nuai 2 a seng a ni.