No.1214/2021-2022 

Lunglei the 1^st July, 2021 - Agriculture Minister Pu C. Lalrinsanga chuan vawiin khan Lunglei lo thlengin a Department chan hnuaia hmalakna pawimawhte a tlawh nghal bakah a bial chhunga VLTF-te tlawhin tanpuina a hlan a ni. Minister hi Lunglei HPC Vice Chairman Pu Lawmawma Tochhawng, sawrkar official leh party hruaituten anlo dawngsawng a ni.

Agriculture Minister leh amah zuitute hian cheng Nuai 200 chuang senna tur hmalak mekna Lungleia Agriculture hmunhma vawiin chawhnu khan a tlawh. Agriculture Minister in a tlawh hi District Agriculture Office sak hna kalpui mek leh Staff Quarter leh Agriculture Warehouse sakna tur ruahmanna kalpui mekte a ni. Heng hmasawnna hna thawh mek hi NABARD sum cheng Nuai 200 chuang senga siam tur niin, hnathawh kal mek leh hmalak chhunzawm dan turte Minister hian a enfiah a ni. Minister chuan ruahmanna te tha taka tih puitlin a nih theih nan Department hotute pawh hnathawh kal mek uluk taka enpui tur leh Lunglei mipuite tana Bazar hmunpui a nih angin mipuite tana harsatna awm thei lo tur zawnga hmalak tul a tih thu a sawi a, Lungleia Agriculture Department Complex a hmalakna kalpui mek chu a hlawhtlin hunah Department mai bakah mipuite tan a la tangkai hle dawn a ni a ti. Helai hmunah hian HPC Lunglei pawhin tualchhung thlai thartu te thlai thar zawrhna tur leh dahthatna tur sak an tum mek a ni bawk.

Minister hian National Hydrology Project (NHP) kaltlanga nuai 250 senga sak mek Irrigation & Water Resource Department hnuaia Southern Data Centre tlawh bawkin hmalakna te a enpui a, chak zawka hmalak zui tul a tih thu leh harsatna an neih te a tul anga sutkian pui zel a tum thu a sawi.

Agriculture Minister in helai hmun a tlawhna ah hian Agriculture Board Member ten tawiawm in Pu C. Malsawmkima DAO Lunglei, Er.Laldinpuii E.E, I& WRD Lunglei leh an thawhpui ten an tawiawm a ni.

Minister hian a bial chhunga Rahsiveng VLTF-te tlawh nghalin Covid-19 dona hmanrua hrang hrang – PPE, disinfectant, sprayer, tarpaulin etc leh pawisa fai cheng sing khat a hlan a. Covid-19 hirleng avanga hun rei tak kan buai tak hnuah pawh tha thlah lova khawtlang leh mipui tana an inpekna chu chhuanawm a tih thu sawiin an chungah lawmthu a sawi a ni.

Minister hian naktukah a bial chhunga veng hran hrang VLTF-te a tlawh chhunzawm dawn bakah Lunglei Civil Hospitala laboratory building hmalakna a hmunah a tlawh dawn bawk a ni.