No.3522/2020-2020

Vawiin khan Agriculture Minister Pu C. Lalrinsanga’n SAMETI Conference Hall, Aizawl-ah Green Ag: Mizoram State Inception Programme hawngin khuallian a ni.

Khuallian Pu C.Lalrinsanga chuan thu sawiin COVID-19 hripui leng karah Mizoram hmasawnna tura project pawimawh tak hawn theih a nih chu lawm awm a ti a, Green Ag hi Project danglam bik nei, thiamna inhlan chhawnna project a ni hi a ni, a ti a. External Funding niin, khawvel hmun hrang hrang atanga mi thiamte nen thawkhoin hma lak a ni dawn a ni, a ti a. He project hi Global Environment Facility funding a ni a, United Nation peng pakhat FAO in a thawk (implement) thung a, Mizoram-a Protected Area lian ber pahnih Dampa Tiger Reserve (Mamit District) leh Thorang Wildlife Sanctuary (Lunglei District) te a tuam dawn a ni, tiin a sawi a. He project hi Mizoram chauh ni lo, state dang, Uttarkhand, Odisha, Madhya Pradesh, Rajasthan-ah te kalpui mek a ni a, Mizoram chu India ram state tlemte zinga hmahruaitua a awm thei chu lawmawm a ti bawk a ni. Green Ag Project hmang hian Thorang Wildlife Sanctuary leh Dampa Tiger Reserve bul hnaia khua 30-ah (tun dinhmun) tha zawk leh awmze nei zawka an nitin eizawnna an kalpui zel theihdan tur te, thlai thar tha zawk leh hlawk zawk an neih dan tur te, tlangram lo neih dan tha zawk leh sik leh sa inthlak danglam nasat avanga lo neihdan inthlak leh nghawng nasa tak do na te, thing leh mau, sava leh ramsa kan hmuh leh hriat ngai mumal tawh lohte ko kir thei tura ruahmanna siam a ni ang, a ti a.

Minister chuan thawhhona tha a pawimawh a ni tih hriain he project a thawk zawng zawng Technical Support Group leh Line Department zawng zawng te tangho a, Mizoram hmasawn nana thahnem ngai taka hmalatu niturin a sawm theuh bawk a ni. Minister chuan Green Ag chuan Lunglei leh Mamit District-a mite tan malsawmna ropui tak thlen se, tiin duhsakna a hlan a ni.

He hun hi Pu Lalhmingthanga, Commissioner & Secretary, Agriculture Department in a kaihruai a, Pu Tomio Shichiri, FAO- India Representative; Dr. Alka Bhargava, Additional Secretary, DAC & FW; Dr Thomas Hofer, Senior Forestry Officer, RAP, Green-Ag Project te pawhin video conference kaltlangin Green-Ag Project kalphung an sawi a. Pu Rohmingthanga Colney, State Project Director, Agriculture Department (CH) chuan lawmthu sawiin he hun hi a khar a ni.

‘Green Ag: Transforming Indian Agriculture for global environmental benefits and the conservation of critical bio-diversity and forest landscapes’ hi a tawi zawngin Green Ag Project ti a sawi a ni.