2180/2023-2024

Aizawl, the 5th October, 2023: Agriculture Minister Pu C.Lalrinsanga chuan vawiin chawhnu dar 3 khan Tuirial Airfield-ah thei leh thlai sawngbawlna, vawnthat leh pack-na hmun, Agricultural and Processed Food Products Export Development Authority (APEDA), Ministry of Commerce & Industry, Govt. of India kaltlanga ruahman 'Pack House for Fruits and Vegetables' a hawng.

Agriculture Minister Pu C.Lalrinsanga chuan kuthnathawktute thar chhuah thei leh thlai sawngbawlna, vawnthatna leh pack-na tur hmun 'Pack House for Fruits and Vegetables', Tuirial Airfield-a hawn a ni chu lawmawm a tih thu sawiin, tangkai taka hman tum a ni, a ti a. A puitlin theih nana hmalatu hrang hrangte inpekna fakawm a tih thu a sawi a. Mipuite'n Pack House chungchang chu chiang zawkin hria se a duh takzet thu sawiin, tangkai taka an hman a duhpui thu leh anmahni tiphurtu ni ngei se a duh thu a sawi bawk. Agriculture Department hnuaia hmasawnna hrang hrang hmuh tur awm zel chu chhuanawm a tih thu leh phurna a pek thu sawiin, Department hnuaia thawktu leh a beltu Loneitute chu taimakna leh rinawmna nena theihtawp chhuah turin a fuih a ni.

RKVY atangin Quintal 60 leng Cold Storage 6, thei leh thlai thar tamna khaw hrang hrangah bun tum a nih thu leh adangte pawh a tahtawla ruahman zel tum a nih thu a sawi a. Ram neitu dik tak te'n buh leh bal hlawk zawka an thar theih nan leh crop pattern siam danglam kawngah tanlak tum a nih thu sawiin, kuthnathawktute thlai thar zawrhna tur thlenga ruahman tum a ni, a ti a. Irrigation & Water Resources Minister ni bawk chuan PM KUSUM kaltlangin hmun hniam zawk atanga hmun sang zawka nizung hmanga tui pump chhuahna tur Solar Water Pump 1,700 pe chhuak tura ruahmanna kalpui mek a nih thu sawiin, hei hian thei leh thlai thar chhuah tihpun kawngah nasa takin min pui thei dawn a ni, a ti a. Tharchhuah mai bakah food processing lamah pawh tanlak deuh deuh tum a nih thu a sawi a. Pack House for Fruits and Vegetables hawn tak chu tun thal chhoah tangkai taka hman tan tum a nih thu leh enchhinna atanga tawnhriat neihte tangkai taka hman zel tum a nih thu a sawi bawk.

He hun hi Agriculture Secretary Pu H.Lianzela chuan kaihruaiin inlawmna leh kalkhawmte inhmelhriattirna hun a hmang a. Rev. Dr. Lalchawimawia'n hunserh hmangin Er. Lalchhanliana, E.E (Agri. Engg.), Directorate of Agriculture-in technical report a pe a. Pu Joydev Roy, BDM, APEDA leh Pi Lalawmpuii, Gen. Secretary, Community Development Action and Reflection (CDAR) te'n thu an sawi bawk a. Pu Vanlalthlamuana, Addl. Director, Agriculture Department-in lawmthu sawiin hun hman a khar a ni.

Pack House hi Loneitute thei leh thlai thar sawngbawlna, vawnthatna leh fun thatna (packaging) tihna tura ruahman a ni a. Mizoram Sawrkar leh APEDA chuan October ni 28, 2015 khan MoU an ziak a. CDAR te ram thawh 1.2 Hectare huamchhungah he hmalakna hi kalpui niin, cheng nuai 944.69 sen a ni a, APEDA in cheng nuai 800 tumin State Sawrkarin cheng nuai 144.69 a tum thung a ni. PPP mode a kalpui niin, CDAR chu Project Facilitator, Coordinator & Partner niin, Food & Agribusiness Strategic Advisory & Research (FASAR) leh YES Bank Ltd. chu project consultant an ni.

Project hian component hrang hrang a nei a. A pui ber Pack House building hian block 2, Processing Block leh Cold Chamber Block a nei a. Processing block-ah hian thei leh thlai sawngbawlna line 2 awmin heng khawlte hian darkar khat chhungin thei leh thlai Metric Ton 2-3 thleng ve ve sawngbawl thei tura duan a ni a. Heng khawl hmang hian thei leh thlaite silfai, a lendan zela thliar hran, tihhul leh hruk tlet hlarhnate a awm a, a dahvawhna tur Cold Chamber-a dahluh hmaa lo dah lailawkna tur Pre Cold Chamber, Metric Ton 125 dah theihna a awm bawk.

Cold Chamber Block-ah hian Cold Chamber room lian tak tak 8 a awm a. Heng room-te hi 10m x 12m x 3.5m a lian niin, Metric Ton 125 thlai leh theirah dahluh theihna an ni a, avaiin Metric Ton 1,000 a vawnthat theih a ni. Cold Chamber-te hi a tul dan anga -40 atanga 4 Degree Centigrade-a tih vawh theihte an ni a. Heng bakah hian he project hnuaiah hian Office building chhawng sak a ni a. Refrigerated Van 2, Electric Transformer 350 KVA, Water Harvesting tank litre nuai 2.5 lenna, Staff Qrts leh Water Storage Tank-te a awm bawk a. Building chung atang hian ruahtui lakluhna tha tak siam a nih bakah luite tui lakna thui tak zam a ni bawk a. Loading leh unloading-na hmun tur leh motor parking-na tur kawt zawl zau tak ruahman a ni bawk.