3501/2023-2024

Dated Serchhip, the 25th January, 2024: Vawiin khan Agriculture Minister Pu PC Vanlalruata chuan Tawitlang Block MHIP Conference vawi 12-na Chhingchhip-a Zonu Leng Runah a hmanpui.

Minister Pu PC Vanlalruata, bialtu MLA ni bawk chuan MHIP Block Conference hmangtute chibai bukin, duhsakna a hlan a. Hmeichhiate chu Pathianin ropui takin a siam a, mipa ropui te phenah hmeichhe fel tak an awm zel tih sawiin ram leh khawtlang inrelbawlna pawh hmeichhe tel loin a kal tak tak thei lo, a ti. Midang hmuh leh hriatah ropuina langsar khum lo mahse, an dinhmun theuhah an ropuiin an pawimawh tih hre turin khawmpui hmangtu MHIP member te a fuih a. Hmeichhe dinhmun chawikanna kal zelah India Sawrkar chuan MP leh MLA ah te hmeichhe tan reservation a siam dawn a, chuta tana lo inbuatsaih tur chuan Mizo Hmeichhia te a chah a ni.

Mizo hnam dam khawchhuahna tur leh kan hnam a lo ropui theih nan pianpun kan mamawhzia Pu PC Vanlalruata chuan a sawi a. Kan tu leh fa lo kal zel tur te thinlungah pawh hei hi kan tuh tur a ni, a ti. Naupang enkawl kawngah nu te mawhphurhna a sang em em a, ruihtheihthil leh mipat hmeichhiatna hman khawlohna lak ata kan hnam leh kan ram a fihlim theih nan naupang enkawl kawngah tan kan lak lehzual a ngai a ni, khuallian chuan a ti.

Tawitlang Block MHIP hian khaw hrang hrang 16 a huam a, MHIP Branch 19 an awm a ni. Conference hi January 24 ah tanin Chhingpuii Runah rorel inkhawm leh hruaitu thar thlanna hun an hmang a. 2024-2025 chhunga President atan Pi Lalsiamliani (Chhingchhip Mualpui), V. President atan Pi K Lalhmunthangi (Khumtung), Secretary ah Pi R Sangzeli (Chhingchhip Venglai), Asst Secretary ah Nl Hmingthanzauvi (Chhingchhip Venghlun), Treasurer ah Pi Lalsiamkimo (Baktawng Dawrveng) leh Finance Secretary ah Pi H Lalruatkimi (Baktawng) te chu thlanchhuah an ni.

Vawiin program hi an President Pi Lalsiamkimi’n a kaihruai a. Block Conference hmasa leh tun inkara an member boral mi 28 sunna hun an hmang a, kum 10 OB ni zawn leh Kum 25 a zawna hruaitu lo ni tawh te chawimawina hun an hmang a. MHIP General Headquarters leh Serchhip MHIP Sub Headquarters hruaitu ten conference hi hmanpuiin lawmpuina leh chibai bukna thu an sawi bawk a ni.