2087/2024-2025

Dated Aizawl, the 17th September 2024: Vawiin chawhma dar 11:00 khan Agriculture Minister Pu PC Vanlalruata chuan ni thum (17-20, Sept, 2024) chhung awh tur 26th Mizoram Official Taekwondo Championship chu SAI State Training Centre, Mission Vaengthlang Aizawlah khuallian niin a hawng.

He hawnna hunah hian khuallian Pu PC Vanlalruata chuan kalkhawmte hmaah thu sawiin, Taekwondo chu sport chi hrang hrang zinga pawimawh tak pakhat a nih avangin ngaihhlut zual a pawimawh a ti a. Player-te inpekna chu fakawm a tih thu tarlangin, rilru leh tih takzeta khel turin a fuih a. Inelna hmachhawn kawngah rilru hrisel neih a pawimawhziate, chak leh chak loh dan thiam turte, zuk leh hmuama fihlim turte, insawizawia ei leh in a invawng turtein a chah nghal a. Player-te chu sang tak thleng turin duhsakna a hlan nghal a ni.

He hawnna hun hi Pu R. Lalrinmawia, Vice President, MATA chuan kaihruaiin, Pu Joseph Thansanga, General Secretary, MATA hnen atangin technical report ngaihthlak a nih hnuin, infiammite'n thutiam lakna an nei a. Hemi zawh hian Prof. Rualkhuma Colney, President, MATA chuan infiammite fuihna thu a sawi a. Pu V.L. Sawma, Sr. Vice President, MATA chuan lawmthu sawiin hun hman hi a khar a ni.

Mizoram Official Taekwondo Championship hi kum 1989 atangin Mizoramah huaihawt a lo ni tawh thin a. He inelnaah hian Mizorama District hrang hrang atangin an rawn tel thin a ni. Tun tum 26th Mizoram Official Taekwondo Championship bikah hian District pasarih atangin infiammi 372 telin, heng infiammite hi category hrang hrangah then an ni a. Intihsiakna hian ni thum chhung a awh dawn a ni.