Vawiin khan Agriculture Department chuan NWDPRA leh WDPSCA hnuaia District Officer te, PIA te leh Project Functionaries te tana buatsaih ni 2 chhung awh tur Orientation Programme chu Conference Hall, Beraw Tlangah an hmang. He hunah hian Pu H.Liansailova, Agriculture Minister chu Khuallian niin, Pu K.S.Thanga, Parliamentary Secretary, Agriculture chu Khual Zahawm a ni. He Orientation programme hman pah hian Agriculture Department-in Mizoram Agriculture Service Rules an neih thar chu an lawm nghal bawk.

Khuallian Pu H.Liansailova chuan Agriculture Officer te leh Field Staff kalkhawmte chu Service Rules an lo neih tak avanga lawmpuina a hlan a, dinhmun tha zawka an lo din tak avangin anmahni hnaah taihmak chhuah lehzual turin a fuih. Agriculture hi ram dinchhuahna bulpui tak tak a nih avangin a thawktu Officer-te an pawimawh rualin kut hnathawka eizawngtute pawh an pawimawh a, kan hlawhtlin leh hlawhchhamnaah mawh an phur ve ve a ni, a ti. Agriculture hi hlamchhiah theih a ni lo a, a hlawhtlinna tur hian loneitu leh Department-a thawktute thawhhona tha leh langtlang neih a ngaih thu a sawi bawk. NLUP pawimawhzia sawiin NLUP hlawhtlinna tak tak chu Agriculture mithiamte kutah thui tak a innghah thu leh NLUP Programme hmanga ei leh bara intodelhna kawng zawh tura mipuite kawng dika an kaihhruai a tul a ni, a ti.

Khual Zahawm Pu K.S.Thanga pawhin Agriculture Officer te leh Field Staff te chu Service Rules an lo neih tak avanga lawmpuina thu a sawi a. Tunlai khawvel milin kawng engkimah khawl hmanga hnathawh uar zel turn a nih avangin helama mipuite pawh zirtirna pe uar zel a pawimawh thu a tarlang.

Vawiin inkhawm hi Pi L.Tochhong, Principal Secretary in a kaihruai a, Pu K.Lianzuala, MLA leh Pu T.T.Zothansanga, MLA te pawhin an hman pui a. Agriculture Department atanga pension-a lo chhuak tawh Officer engemaw zatin an hman pui bawk.