4253/2024-2025

Dated Serchhip, the 14^th February, 2025: Vawiin chawhma khan Serchhip DC Meeting Hall-ah Digital Agriculture Mission hnuaia hmalakna chungchang meeting neih a ni a, he meeting hi Pi Ramdinliani, Special Secretary, Agriculture Department, Govt. of Mizoram chuan a kaihruai a ni.

Chairman hian Digital Agriculture Mission hnuaia Department in hmalak a tum dan hrang hrang a sawi a. He Mission hi zawh fel a nih theih chuan Department zawng zawngin kan hmang tangkai tawh dawn a ni, a ti.

Digital Agriculture Mission hnuaiah Serchhip District chu Drone hmanga Agricultural Land Aerial Survey neih hmasak berna leh enchhinna pilot project atan thlan chhuah niin, hmalak nghal a ni a. Drone Survey Team atan Theta Enerlytics te chu thlan niin tunah hian drone survey an kalpui mek a ni.

Pu Karan Dhaul, Chairman & Co-Founder Theta Enerlytics chuan Drone survey kalpui dan tur leh Agriculture hmasawnna tur atana ruahmanna an siam te Power Point hmangin a sawihfiah a. District Agriculture Office, Serchhip pawhin an hmalak tawh chin report kimchang an tarlang bawk.

Meeting-ah hian hriatfiah loh leh sawiho ngai te sawiho a ni a. He Mission hi tangkai taka hman a nih theihnan Department ten thawhhona tha an neih a tul thu te,  Drone Survey neih zawh a nih hnuah Land & Revenue Department ten kuthnathawktute ram chin chipchiar zawkin survey chhuah leh vek a ngaih dawn thu te meeting ah hian tarlan a ni.

Vawiin meeting-ah hian DC Pu Paul L.Khuma SDO(S), Settlement Officer, SDC te bakah Agriculture, Horticulture, AH&Vety, Sericulture, Fisheries, Soil Department hotute leh Police te an tel a ni.