DIRECTORATE OF INFORMATION & PUBLIC RELATIONS, Government of Mizoram, India

4634/2025-2026

Lunglei, 2026 Ramtuk thla ni 27: Lunglei District Agricultural Technology Management Agency (ATMA) huaihawta Lunglei Agriculture Complex-a ni hnih awh tur Kut Hna Thawktute Kutpui, "Kisan Mela" buatsaih chu vawiin khan Mizoram Sawrkara Agriculture & Farmers Welfare Department Secretary Pi Ramdinliani'n a hawng.

Agriculture Secretary Pi Ramdinliani chuan Lunglei District Kisan Mela hlung tak buatsaih theih a ni chu lawmawm a tih thu sawiin, agriculture leh a kaihhnawih department-te hna thawh leh kut hna thawktute hmasawnna tar langtu pawimawh tak a nih thu a sawi a. Lunglei chu Mizorama district lian ber a ni chungin kut hna thawktute thar chhuahah a la intodelh tawk lovin, hmasawn theihna tam tak a la awm tih a sawi a. Kut hna thawktute'n taima taka an thawh a, an thar chhuah pawh a ṭhat viau laiin, inkal pawhna kawng ṭha tawk lo avangin a deh ralna lamah harsatna a awm ṭhin tih a sawi a. Sawrkarin thlai thar hralhna a ngai pawimawh tih sawiin, scheme hrang hrang hnuaiah kut hna thawktute thar chhuah deh ralna tichangtlung turin hma a la mek tih a sawi a. Lunglei District chu thlai hrang hrang ṭhat theihna hmun a nih thu sawiin, kut hna thawktute tana chhenfakawm leh innghahna tlak ni turin department-te chu ṭan la sauh sauh turin a chah a. Mizoramah jute chin kal chhohpui tum mek a nih thu leh a chinna hmun tur a awm ṭhat thu te, cocoa chin pawh kalpui chhoh tum a nih thu te sawiin, thlai hriak nei leh be lam chi te, market ṭha thlai chin tur tam tak la awm chu luh chilh turin kut hna thawktute a chah a. Tun lai thiamna leh khawl changkang hman ṭangkai thiam a pawimawh thu sawiin, SMAM hnuaia Custom Hiring Centre te pawh kut hna thawktute'n hmang ṭangkai turin a chah a. Kut hna thawktute ban phakah leiṭha man man zawka dah turin sawrkarin hma a la tih sawiin, thlai chi leh leiṭha hman chungchangah te, thlai enkawl dan chungchangah te mi thiamte thurawn leh zirtirna ngai pawimawh a, zawm turin a chah a. Kisan Mela chu hlawk taka hmang tur te, thil hriat zau belhna atan leh sum leh pai lak luhnaa tiṭhangtu atan tea hmang turin duhsakna a hlan.

Lungleia Kisan Mela hawnnaah hian Agriculture & Farmers Welfare Deputy Secretary Pi Lalremruati, Lunglei District Additional Deputy Commissioner Pi Zoramdini, Mizoram Agricultural Marketing Board (MAMB) Member Pi Laldikkimi leh MAMB Deputy Managing Director Dr David Fangzauva te, Lungleia sawrkar department hrang hrang hotute leh thawktute, kut hna thawktute leh mipui ṭhahnem tak an kal khawm a. Lunglei District Agriculture Officer & ATMA Project Director Dr Samuel Lalliansanga chuan inlawmna thu sawiin, Kisan Mela chu kut hna thawktute thawh chhuah hlawk zawk a awm theih nana tun lai thiamna (technology) puan chhuah leh inzirtir nan te, sawrkar ruahmanna (scheme) hrang hrang puanzarna atan te, kut hna thawktute thar chhuah hralhna (market linkage) atan leh kut hna thawktu ṭha inhriatpuina leh inchawimawina atan te buatsaih a nih thu a sawi.

February ni 27–28, 2026 chhunga Lunglei District Kisan Mela kalpui turah hian stall 21 awmin, Agriculture, ATMA, Horticulture, AH & Veterinary, Fisheries, Soil & Water Conservation, Sericulture, KVK Lunglei, ICAR, MzSRLM, NEIDA, SELCO Foundation, Jute Corporation of India, Cadbury leh tualchhung mi kut hna thawktu, thil siam chhuaktu leh lo neihna hmanraw zuartute an inpho chhuak a. He Kisan Mela-ah hian kut hna thawktute thil deh chhuah hrang hrang man man zawka lei theiha chhawp chhuah niin, AH & Veterinary Department leh KVK te'n ran leh thlai hriselna dinhmun endikna (Animal & Plant Health Clinic) an buatsaih nghal bawk a. Ran vaccine leh damdawi hrang hrangte a ṭul leh remchan dan angin sem/pek chhuah a ni bawk.

Kisan Mela pual hian chhun lamah Lunglei District Horticulture Hall-ah Lunglei Assistant District Agriculture Officer Pu K. Lalrinfela kaihhruaiin kut hna thawktute leh mi thiamte inkawm hona, Farmer–Scientist Interaction Programme buatsaih a ni a. Resource person hrang hrang – Pu Amal Jose, Senior Technical Excecutive (Cocoa-Operations), Mondelez India Food Private Limited; Dr Lungmuana, Senior Scientist (Soil Science), ICAR-Kolasib, Mizoram Region; Pu Subhajit Ghosh, Assistant Manager (Operation/Marketing), Jute Corporation of India; Dr M. Samuel Jeberson, PhD (GPB), Professor (GPB), Department of Vegetable Science, College of Horticulture, Central Agricultural University(I), College of Horticulture, Thenzawl, Mizoram; Dr H. Lalpanmawia, Veterinary Officer, Lunglei; Zosangliani Varte, Subject Matter Specialist, KVK, Lunglei; leh Dr Zohmingmawii Sailo, CIRL Expert, GLUI Green Ag, Lunglei te'n kut hna thawktute hriat tur pawimawh hrang hrang an zirtir a. Zawhna leh chhanna leh sawi hona hun hman a ni bawk.

Attachment