Vawiin khan AH &Vety Minister Pu Nihar Kanti Chakma chuan Lawngtlai District, Mampui khua a AH&Vety Farm a tlawh.

Minister chuan ran vulh chungchanga nasa taka mipui inzirtirna an neih tawh thu leh kalphung ngai renga kal lova kalphung thar leh changtlung zawk ngaihtuah a tul thu a sawi a. Farm hi hmun tam takah Vety hian a nei a, a farm enkawlna leh thawktute hlawhah sum tam tak a kalral a, chuvang chuan a sum thawk chhuak lam zawng, commercial oriented a kal a tul tawh a ni, a ti a. District hrang hrang leh khaw hrang hranga an harsatna te hriatpuia an dinhmun a taka hmuhpuiin, changtlung zawk leh hlawk zawka kalpui dan tur ngaihtuahna thar a pek beiseiin Pu Nihar Kanti Chakma hian Vety farm te hi a hmun ngeiah a tam thei ang ber a tlawh chhuak a ni. Minister hian Expert Committee, Additional Secretary AH & Vety Dept Chairman-na hnuaiah dinin Vety Department tha zawka kalpui dan tur an ngaihtuah a, he Committee hian sorkar hnenah pawh an report an thehlut tawh a ni. Hun remchang hmasa berah State Veterinary Officer zawng zawng te koh khawm a he committee report hi enho a sawiho pui a tum thu leh kalphung tha zawk ngaihtuahpui a tum thu Minister hian a tarlang bawk.
 
Mampuiah hian AH &Vety hian Hectare 10 vela zau ram an nei a. Ar vulhna, Bawng vulhna leh Vawk vulhna tha tawk tak an nei a. Tunah hian vawkpui 8, ar 622 leh bawngpui 5 an vulh mek a ni.

Pu Nihar Kanti Chakma hi Lai Autonomous District (LADC) Council Chairman Pu F Rohnuna, Adviser to CEM (LADC) Pu Rualirha leh Town Committee Chairman Pu L. Lawmkima ten an tawiawm a. Anni bakah hian AH&&Vety Deputy Director Pu Jasper Rongura Sailo, Sericulture Asst. Director Pu Rozama leh Information and Public Relations Officer Pi Lalnunmawii ten an tawiawm a.  Minister hi Sangau, Lawngtlai District a Independence hmang turin vawiin hian Sangau khua a pan zui nghal a ni.