1125/2024-2025

Champhai. 10th July 2024: Vawiin khan AH & Vety Department, Champhai District chuan Champhai Kahrawt Branch YMA Hall-ah African Swine Fever Awareness Campaign cum Training of Farmers an buatsaih.

He hun kaihruaitu Dr. Lalbiakzuala Sailo, District Animal Husbandry & Veterinary Officer (DAH&VO), Champhai District chuan kalkhawmte inlawmna thu sawiin African Swine Fever hri a darh zel loh nan sawrkar leh mipuite tanrual a tul a ni, a ti a. Vawk vulhtu kalkhawmte chu vawk thi a awm reng rengin a rang thei ang bera AH&Vety Department hotute hrilh hre tur in a chah a, mi pakhat fimkhur loh rah khawtlangin an tuar thei tih hre reng turin a chah bawk.

Dr. P.L. Lalruatfela, Veterinary Officer, District Veterinary Hospital, Champhai chuan he hunah hian ASF natna hrik tobul, natna hrik dam rei zawng, inkaichhawn dan, natna lanchhuah dan, inven dan tur leh ASF vanga vawk thite sawngbawl dan tur chungchang te sawiin kalkhawmte hi zirtirna a pe a ni.

He huna tarlan danin kum 2024 chhung hian African Swine Fever vangin Mizoramah vawk 5,321 an thi tawh a, vawk 10,040 suat an ni tawh bawk. ASF vanga vawk thi zawng zawng hlut zawng hi cheng nuai 2008.05 (⟨₹ 20,08,05,321) vel ni tura chhut a ni a. Hei bakah hian sawrkar beng thleng lo, ASF vanga vawk thi engemawzat an awm rin a ni bawk.