2801/2026-2027
Aizawl dated 23rd October 2026: Mizo Veterinary Sciences and Animal Husbandry zirlai intelkhawmna, All Mizo Veterinary Medical Student Association (AMVMSA) chuan vawiin khan College of Veterinary Sciences & Animal Husbandry, Selesih Auditorium-ah kum 25 an tlin lawmna ' AMVMSA Silver Jubilee Celebration' an hmang a. Pu Lalsangliana, Secretary, Animal Husbandry & Veterinary Department chuan khuallian niin a hmanpui a. Prof. Lalnuntlaungi Hmar, Dean, CVSc & AH leh Dr. Lalnunfeli Tochhawng, Registrar, Mizoram State Veterinary Council ten an telpui bawk a ni.
Khuallian Pu Lalsangliana, Secretary, AH & Vety Department chuan mizo veterinary sciences zirlai intelkhawmna pawl pawimawh tak, AMVMSA-in kum 25 hmel hmu a, Silver Jubilee lawm theia an awm chu a lawmpui thu a sawi a. BVSc zirna chu ei leh bara intodelhna kawnga thiamna pawimawh tak a nih thu sawiin, ram tih hmasawnna kawnga mi tangkai tak nih tum zel turin kalkhawmte a chah.
Pu Lalsangliana chuan kan thiamna leh theihnate chu ram tana hman tangkai duhna thinlung put a pawimawh, tih a sawi a. Min mamawhtute harsatna sutkian saktu kan nih theih nan kan zirlai ah kan chian hle a ngai, tih a sawi a, awmze neia hnathawk thiam nih a tul thu a sawi a. Hlawhtlinna tak tak hmu tur chuan tih takzetna nen, hmasawn duhna tak tak nena hna thawk thin turin kalkhawmte a fuih.
Khuallian chuan CVSc & AH-a zirlaite chu an zir chhuah huna hna an zawn hunah pawh eizawnna ngelnghet neih duh vang ringawt ni lovin, mipui leh ram tana rawngbawl duhna rilru puchunga hna zawng thin turin a chah a. Mahni zirlai ah theihtawp chhuah turin leh mahni hna a chiang a, inpekna thuk tak nena mipui rawngbawl thin turin AMVMSA Silver Jubilee lawmna a kalkhawmte a fuih bawk a ni.
Prof. Lalnuntlaungi Hmar, Dean, CVSc & AH chuan AMVMSA chu mizo veterinary sciences zirlaite nun kaihruaitu pawl pawimawh tak a nih thu sawiin, hnam dang zirlaite zingah mizo nun ze mawi, tlawmngaihna chhawm nungtu leh zirlaite harsatna hrang hrang chinfel sak thintu pawl pawimawh tak a nih thu a sawi.
AMVMSA Silver Jubilee lawmna ah hian Dr. Lalhumliana Tochhawng, Chairman, Organising Committee chuan kalkhawmte lawmna thu a sawi a, Dr. C.Lalchhandama, Asst. Professor chuan Secretary report a pe a ni. Kum 2001-a AMVMSA din tirha Office Bearer-te chawimawina hun hman niin Dr. Blessa Sailo, Sr. Scientist, ICAR, Kolasib leh Dr. K.Lalnghinglova, MF&AS ten AMVMSA din a nih dan leh Mizo Veterinary Sciences zirlaite tana hmalakna an lo kalpui tawh dante an tarlang a ni.
Vawiin AMVMSA Silver Jubilee lawmna hun hi Dr. Malsawmtluangi Ralte in a kaihruai a. Jubilee dar vuakna hun te neih niin member lo ni tawh zinga boral sunna hunte neih a ni. Silver Jubilee lawmnaah hian AMVMSA Headquarters chu Khanapara atangin AMVMSA Sub-headquaters, Selesihah sawn tura ruahman a ni. AMVMSA Sub-headquaters, Selesihah hian member ni mek hi mi 63 an awm a, AMVMSA member lo ni tawh zawng zawng hi mi 235 an awm a ni.
