Vawiin khan Ramrikawnah, AH & Vety Minister Pu C. Ngunlianchunga chuan Animal Feed Plant thar a hawng a. Programme hi AH & Vety Department buatsaih a ni.

Khuallian Pu C.Ngunlianchunga chuan neitu thinlung pu chunga hnathawh chuan hlawhtlinna a thlen thin thu sawiin chutiang tak chuan Feed Plant thar chu enkawl a ngaih thu a sawi a. A hmaa khawl awm chuan ni khatah quintal 80 a her chhuah theih laiin Plant thar hi chuan darkar khatah quintal 80 ran chaw a her thei dawn a ni tiin hmasawnna duhawm tak a ni, a ti a. Animal Feed Plant thar siamna tana ruahmannate a tarlang a. Ran chaw siamna atana hman hi ram pawn atanga lak deuh vek a ni tiin Feed Plant atana mamawhte kan intodelh theih nan kuthnathawktute pawhin tan an lak a ngai a ni, a ti a. Ran chaw siamna atana thlai pawimawh tak pakhat chu vaimim a ni tiin Mizorama vaimin tharchhuahte chu Animal Feed Plant-ah hian tangkai taka hman an ni dawn a, Animal Feed Plant hawn pah hian kuthnathawktute tan pawh an thlai thar chhuahte zawrhna tur kan hawng nghal bawk a ni, a ti a. Rashtriya Krishi Vikas Yojana (RKVY) hnuaia district hrang hrangah ran vulhna lamah hmalak a nih thu a tarlang a. Mahni hma zawn theuha kan hna hi rinawm leh taima takin kan thawh a ngai a ni, a ti a. Animal Feed Plant thar hawn a ni chu lawmawm a tih thu sawiin ran vulhtute pawhin an hlawkpui ngei a beisei thu a sawi bawk a ni.

Feed Plant hi NABARD-RIDF bultum a ni a. Mizorama tharchhuah vaimim leh thlai dang ran chaw siamna atana hman a nih theih nan ruahmanna siam niin heng atanga siam chhuah ran chaw hi man tlawm zawka ran vulhtute hnena zawrh leh tur a ni dawn a ni. He Feed Plant hian ran vulh hrang hrang an mamawh dan milin an chaw tur a her thei a, Plant hi chum lo chat lova (continuous) chhawr theih a ni bawk. SG Mechanical Works, Ludhiana chuan a sak hna an thawh bakah Animal Feed Plant-a bungrua leh khawlte hi an bun bawk a. Plant zawh fel nan hian cheng nuai 551.08 hman a ni. Feed Plant enkawl tur hian AH &Vety Department Director Chairman-na hnuaiah Management Commitee duan sa a ni a. Tun dinhmunah hian Feed Plant-ah hian hnathawk 15 an awm mek a ni.

Minister chuan Feed Plant hi a hawng hmasa a. SG Mechanical Works chuan Feed Plant hnathawh dan entirna hun an nei leh a. Hemi hnu hian hawnna programme tan niin AH & Vety Secretary Pu Lalthangpuia Sailo chuan kalkhawmte lawmna thu a sawi a. AH & Vety Director Dr. Saingura Sailo atangin technical report kim chang tak ngaihthlak a ni a. Jt. Director (P), Dr. Lalnuntluanga Colney chuan lawmthu sawina in hun a khar a ni. AH & Vety Department hotute leh hnathawkte bakah hmun hrang hrang atangin ran vulhtute an tel a ni.