Vawiin khan Animal Husbandry & Veterinary Minister Pu N.K.Chakma chuan AH&Vety Directorate leh Aizawl D.V.O. Office a tlawh a. Aizawl D.V.O. hnuaia Disease Investigation Laboratory leh Feed Analytical Laboratory te chu India hmarchhakah changtlung ber pawl a nih leh tunlaia Bird Flu laka inven nana D.I. Lab-ah ar thisen sample test regular taka buaipui a nih chu lawmawm tiin Department hnathawkte thawhrimna a fak hle.
Minister chuan Department Wing hrang hrang a tlawh hnuah AH&Vety Conference Hall-ah Staff meeting a neihpui nghal a, AH&Vety Director Dr.C.Sangnghina’n meeting hi a kaihruai a ni. Minister chuan thusawiin Vety. Department chu mi rethei ber ber te dawr thin a nih avangin department pawimawh tak a nih thu leh ram intodelhna tura hna pawimawh thawktu an nih tih hre reng turin Department hnathawkte a chah a. Sorkar thar hnuaiah NLUP hman a nih tan hunah pawh Vety department chu department tul ber pawl a nih dawn avangin thawhhona tha a pawimawh dawn a ni, a ti.
