No.2493/2021-2022

Aizawl the 6th October, 2021 : Vawiin khan Dr. K. Beichhua, Honourable Minister of State, AH & Vety, etc., chuan Serchhip District Veterinary Hospital, Rural Infrastructure Development Fund- NABARD sum Rs. 90 lakhs hmanga sak chu a hawng.

A hawnna inkhawm, Hospital thar Training Hall a buatsaihah Minister chuan, hripui leng karah sawrkar chuan theihtawp chhuahin hmasawnna hnate a thawk zela, chung zinga pakhat Serchhip District Vety Hospital chu vawiinah kan lo hawng thei ta a, Serchhip District mipuite ka lawmpui hle a ni, a ti a. Tun hmaa Dispensary ni thin, vawiina Hospital a lo ni tate, Building thar tha tak lo awm ta te chu mellung pawimawh tak a ni, a ti. Minister chuan, kan sawrkar tirh atangin Mizoramin saah, a bikin vawk saah kan intodelh theih nan nasa takin hma kan laa, nimahsela vanduai thlak tak maiin African Swine Fever natna in min chim buai zui ta a ni a, a pawi hle a ni. ASF natna pawh hi pumpelh ngei tumin sawrkar chuan beihpui a thlak a, nimahsela kan indang zo ta lo a ni a, he natna rawn luh dante pawh hi tute emaw sawrkarin himna dan a siamte zawm thalote vanga lo lut a ang hle nghe nghe a ni, a ti bawk. ASF vanga vawk chantute a tawrhpui tak zet tih sawiin; zangnadawmna an hmuh theih dan dapa Central sawrkar amah ngeiin a dawr thu a tarlang bawk. Dr. K. Beichhua chuan, ranvulha eizawn theihna remchang kan ramah a tam avangin thiamna lama intahhriam deuh deuh kan tum a, tun hnaiah Dispensary 6 chu Hospitalah hlan kai tawh an ni a, Rural Animal Health Centre 35 chu Dispensary ah hlan kai an ni tawh bawk a, hmalakna dang tam tak a awm bawk a ni, a ti. AH & Vety Department a thawktute chu rawngbawltu pawimawh an nih zia hriaa, taima taka thawk sauh sauh reng turin a chah bawk.

Minister rawn tawiawmtu Pu C. Lalmuanpuia, MLA, Vice Chairman, Vety & Sericulture SEDP Board pawhin thusawiin, hripui vanga hmasawnna hnate a kal chak thei lo chung pawhin lawmna tur hmasawnna thar hmuh tur a awm zel tih sawiin, Serchhip District Vety Hospital pawh ran vulhtute tan a hlu hle dawn tih a sawi a. Mipuiten tangkai taka hmang ngei turin a chah a ni.

A hawnna inkhawm hi Pi Lalzarmawii, IAS, Secretary to the Government of Mizoram, AH & Vety in a kaihruaia, Dr. H. Laltlanmawia, Director, AH & Vety in Technical Report a pe a. He Veterinary Hospital hi RIFD-XXIII (NABARD) sum Rs. 90 lakhs senga sak niin Contractor hi Malsawm Construction & Consultancy Service, Kulikawn, Aizawl an ni a. A building len zawng dung feet 57 leh a vang feet 30 a ni.

Serchhip District Veterinary Hospital hawnnaah hian Pu Kumar Abhishek, IAS, DC Serchhip, Pu Stephen Lalrinawma, MPS, SP, Serchhip leh Serchhip a head of offices thenkhatte, khawtlang hruaitu sawm bikte leh AH & Vety Department a thawktute an tel a, Dr. R. Lalmakthanga, DVO Serchhip chuan lawmthusawina nen inkhawm a khar a ni.