1585/2023-2024

Aizawl, the 21st August, 2023: A.H & Vety Minister Er. Lalrinawma chuan tukin dar 8 khan Zoram Poultry Development Society (ZPDS) hnuaia Arnote leh Artui thar chhuahna hmunpui, ZPDS INDBRO Hatchery Farm Tanhril tihchangtlun thar chu khuallian niin a hawng. He hunah hian Pu C.Lalmuanpuia, MLA, Vice Chairman, Veterinary, Fishery & Sericulture Board chu khualzahawm niin, bialtu MLA Pu Zothantluanga, Vice Chairman, Manpower Development Board leh Er. H.Lalzirliana, MLA, Vice Chairman, Road & Infrastructure Development Board ten Minister hi an tawiawm bawk.

Khuallian Er. Lalrinawma chuan hlawhtling taka project kalpui tura kalkawng thui tak paltlang a ngaih thin thu leh, ZPDS INDBRO Hatchery Farm Tanhril cheithat leh tihlen hna kalpui hawn fel a ni ta chu lawmawm a tih thu sawiin, thawktute leh tha thawhtute inpekna fakawm a ti a. ZPDS Farm Tanhrilin din a nih atanga vawiin ni thlenga Sawrkarah chhiah engemawzah an chhunglut thei chu fakawm tiin, hmasawn lehzual tura tan la zel turin a chah a. Ran hrang hrang leh a kaihhnawih enkawl kawnga hmalatu A.H & Vety Department-in tha taka mawhphurhna a hlen zel thin leh mipui tana ran chi tha zawk pek chhuah kawnga hmalaknate lawmawm a tih thu sawiin, hei hian sa, artui leh bawnghnute thar chhuah kawnga intodelh tura ke penna kawngah awmze thui tak a nei a ni a ti a, kan thahnemngaihnate hi mipuiin a zar an zo zel a ni, a ti bawk.

A.H & Vety. Minister chuan khawvel changkang zelah thiamna behchhan hmasawnna hrang hrang kalpui a nih thu tarlangin, mihring pung chho zel avanga mamawhna nasa tak awm phuhruk pha ve zel turin thiamna mila kan kal thiam ve zel a pawimawh a ni, a ti a. Department hnuaia thawktute pawh hmasawnna thar ber berte chhawr tangkai zel thei tura inpuahchah tur leh insiamrem thiam zel turin a fuih a. Hlawhtling taka ran vulh leh ei bar dehchhuah kawnga pawimawh hmasa ran chaw siam chhuah chungchangah kuthnathawktu leh line department dangte nena inzarzawm thiam a tul thu leh hmalak ho dan kawng dap zel a tul thu a sawi a. A.H & Vety Department hnuaia thawhhona tha tak awm chu fakawm tiin, chhawmnung zel tura chahin duhsakna a hlan a ni.

Khualzahawm Pu C.Lalmuanpuia, MLA, Veterinary, Fishery & Sericulture Board Vice Chairman chuan Department-in bung thar a kai thu sawiin, ZPDS INDBRO Hatchery Farm changtlung tak hawn a ni chu Mizoram tana chhinchhiah tlak tak a ni, a ti a. Arsa bikah kan intodelh chhoh tawh thu sawiin, artui tha leh thar lam zawk thar chhuah kawnga intodelh tura project-te siama ngaihtuahna senho a tul thu a sawi a. Sawrkar flagship programme SEDP ah A.H & Vety Department chu hamthatna dawngtu ngah leh buai berte zinga mi a nih thu tarlangin, thawktute chu sa, artui leh bawnghnute hrisel leh hnianghnar chhawpchhuah kawnga tan la zel turin a chah a ni.

He hun hi Pi Lalzarmawii, Secretary, A.H& Vety. Department chuan kaihruaiin kalkhawmte lawmna thu a sawi a. Dr. C.Zarzokima, Joint Director (Planning & Monitoring) hnen atangin technical report ngaihthlak a ni a. Farm chanchin tlangpui Dr. Ngursailova, Managing Director (MD), ZPDS INDBRO Hatchery Farm Tanhril hnen atangin ngaihthlak a ni a. Dr. C.Lalrintluanga, Addl. Director (VS&PH), A.H & Vety Department-in sawiin hun hman a khar a ni.

He hunah hian A.H&Vety Department Director Dr. Lalrinpuii Sailo, Joint Secretary Pi Lalsangpuii Hmar, Official dangte, Pensioner leh Chhimphei Women Poultry Producer Company Ltd. hruaitute an tel a ni.

ZPDS INDBRO Hatchery Farm Tanhril tihlen leh tihchangtlun hna hi 'Augmentation & Upgradation of ZPDS INDBRO Hatchery Farm, Tahril' tih project hnuaia thawh a ni a. NABARD RIDF-XXVI 2020-2021) sum cheng nuai 533.76 sengin 'Augmentation of Zoram Poultry Development Society's INDBRO Poultry Hatchery Farm, Tanhril' tih project thawh niin, building sak belh bakah hmanraw hrang hrang lei a ni a. Special Assistance to State for Capital Expenditure, SASCE 2021-2022) sum cheng nuai 445 sengin 'Upgradation of INDBRO Hatchery Farm for Zoram Poultry Development Society at Tanhril' tih project thawh a ni a, a ruhrel awmsa tihchangtlun kawnga pawimawh hrang hrangte thawh a ni a. Hatchery thar te, Staff Quarters thar te, Rainwater Harvesting Tank te, 30 KwP Solar Roof top leh tul dangte chu heng project atangte hian siam a ni.

Arsa leh Artuia intodelh a nih theihna tura kum 1987 a din, Regional Broiler Chick Farm (RBCF) chu kum 2013-2014 khan tih changtlun niin, Zoram Poultry Development Society INDBRO Poultry Hatchery Farm Tanhril tih a ni a. North-East a Breeding farm awm chhun niin breeder bikah chuan INDBRO Brown Layer leh INDBRO Rainbow Rooster-te enkawl an ni a. He farm hiam thiamna changkang Ar kahrai (Artificial Insemination), Cage system, Automatic drinking system leh Hatchery changkang tak, Setting Maching a Artui 3,00,000/- (Nuai thum) leng leh Hatching Machine kar khata Arte 1,00,000/- (Nuai khat) awp keu theite a thuam a ni.
May ni 18, 2015 atanga tun hun thlengin he farm hian Artui 25,70,740 leh Arte 16,98,100 a thar chhuak tawh a, Sorkar-ah chhiah Rs.32,85,679.89 a chhung lut tawh bawk a ni. ZPDS INDBRO Hatchery Farm hian Rainbow Rooster tharte mipui hnenah a hralh bakah A.H&Vety Department project hrang hrang RKVY, FOCUS leh NLM atante a thar chhuak bawk a. A.H&Vety Department farm hrang hrang leh mimal layer vulhte tan Brown Layer a pe chhuak bawk.

ZPDS INDBRO Farm Tanhril hi Breeding Farm niin, Tunah hian chi thlah tur Brown Layer leh Rainbow Rooster-te vulh niin, tun hma chuan Broiler breeder pawh vulh a lo ni bawk a, senso a tam deuh avangin broiler bik chu a tui awp keu tur lakluh thin a ni. Ar note hrisel leh tha lei tur a awm chho zel dawn a, A.H. & Vety Office Khatla leh ZPDS INDBRO Hatchery Farm Tanhrilahte ngaihven theih a ni.