No.2591/2021-2022

Aizawl 13th October 2021: Animal Husbandry & Veterinary Department Minister Dr. K. Beichhua chuan kumin March thlaa vawk pul hri, African Swine Fever (ASF) hmuhchhuahna khua Lungsen, Lunglei District a tlawh a, vawk hrileng avanga khawtlangin harsatna hrang hrang an tawh chungchangah khawtlang hruaitu NGO leh VC te nen inkawmhona hun an nei nghal.

Khawtlang hruaitute nena inkawmhona Lungsen YMA HAll-a neihah AH&Vety Minister Dr K. Beichhua chuan Zoram mipui tana sorkarin hmachhawp a neih te chak taka bawhzuia, kal an tum mek laiin beisei loh lam atangin harsatna hrang hrang a rawn thleng a, mahse heng karah hian hmalam panin ke kan pen zel dawn a ni, a ti. 

Vawk pul hrileng chungchangah Lungsen mipuite dinhmun a hriatthiampui thu leh zangnadawmna pe thei turin sorkar laipuiah theihtawp chhuahin an bei mek zel a ni, a ti. AH&Vety Department chhinchhiah danin Lungsen khua leh a chhehvela African Swine Fever hrileng avanga vawk thi zat chu 960 a ni.

Dr K. Beichhua chuan vawk vulh bul tan that leh chungchangah ram pawn atanga lakluh duh an awm leh tawh tih sawiin, sorkar hian kan ram mipui tana tha ber tur a ngaihtuah thin a, kan mithiam ten a him tawh e an tih hunah chuan a tul angin mipui tan Department pawhin vawk no tha chu a lalut thei a ni, a ti a, vawkvulhtute sorkar thu lo ngaichang turin a ngen nghal. 

Social Welfare Department kaltlanga Lungsena Eklavya Model Residential School din tur chungchangah Social Welfare Minister Dr. Beichhua chuan Landlease chu Central lamin VC pass te a lo remtih loh avangin Land Revenue Department ah lehkha a kal mek a, tihfel a nih hunah hna pawh tan theih thuai a beisei thu a sawi. 

SEDP AH & Vety Board Vice-Chairman Pu C. Lalmuanpuia, MLA pawhin thuchah sawiin, he hrileng hi vawk vulhten inzirna atan hmang tur leh beidawng lova, chakna petu atana hmang se tih a duh thu a sawi a, sorkar thupek zawm tha zelin engtik niah emaw chuan saah Mizoram a intodelh ngei a beisei thu a sawi. 

Khawtlanga hruaitute nena an inkhawmhonaah an mamawh an thlente chu Dr. Beichhua chuan lo bawhzui zel a tum thu a sawi. 

Dr. K. Beichhua hi Vety Board Vice-Chairman Pu C. Lalmuanpuia, MLA, AH&Vety Secretary Pi Lalzarmawii, IAS, Social Welfare Department Secretary Pi Sangchhin Chinzah, AH & Vety Director Dr. H. Laltlanmawia, Social Welfare Director Pi A. Vanlalzawni leh official te bakah party miten an tawiawm. 

Lungsen ah hian Dr. K Beichhua leh amah zuitute hian EMRS sakna hmun tur an enfiah nghal bawk.