Vawiin khan AH&Vety Minister Pu Ngunlianchunga hovin Ah&Vety Directorate Conference Hall-ah meeting pawimawh tak neih a ni a. Hetah hian AH & Vety Secretary Pu C Thatkunga bakah Vety officers te an tel kim hle.

Minister chuan Vety department chu kalphung thar nen, ngaihtuahna thar hmangin, a tha zawnga her danglam a tum, tih sawiin Vety Department enkawl tura sorkarin mawhphurhna a pek chu tha taka hlenchhuah ngei a tum thu leh thawktute tanpuina leh thlawpna a mamawh thu a sawi. Vety Department chu sorkara revenue chhun luh kawngah tan lak a tulzia sawiin a hmangral tu ringawt ni lova a thawk chhuak tu ni zawk turin a fuih a. Sum leh pai thawkchhuak thei, sorkar sum harsatna phuhru tura revenue chhunglut thei tur department nia a hriat thu sawiin taima leh zuala thawk turin a fuih bawk. Minister chuan meeting-ah hian zalen taka an ngaihtuahna te sawi chhuak tur a kalkhawmte sawmin AH & Vety department hmasawnna tur, Zoram mipui te tana tangkai tur leh kum reilote chhunga AH & Vety Department hmel thar a lan chhuah ngei theih na tura tan la turin a ngen a ni.

AH & Vety hotute inhmuhkhawm hi nilenga neih ni in an Director Dr L.B.Sailo chuan a kaihruai a. An deparment a inthlakthlengna tha zawk a thlen theih nan officer rual kalkhawmte'n uluk takin an department hmasawnna tur an ngaihtuah ho a ni.