380/2025-2026

Aizawl, the 29th April, 2025: Vawiin chawhnu khan Animal Husbandry & Veterinary Minister Pu C. Lalsawivunga chuan AI Training Centre, Selesihah Mizoram Veterinary Service Association (MVSA) General Conference vawi 41-na chu khuallian niin a hmanpui a. He hunah hian Pu V. Malsawmtluanga, MLA, Vice Chairman, Lunglei High Powered Committee chu khualzahawm a ni.

A.H & Vety. Minister Pu C. Lalsawivunga chuan ram tihmasawn tura ei leh bar a intodelhna kawng a Department pawimawh tak, AH & Veterinary Department hnuai a thawktute tanrualna leh hna a an inpeknate entawntlak a tih thu a sawi a. Ran vulhtute thleng phak malsawmna leh rawngbawlna thlen tur a thawktu pawimawh berte chu Veterinary Doctor-te an nih avangin min mamawhtute harsatna chhang tur a fehchhuah inpeih reng a pawimawh thu Minister chuan a sawi bawk.

Pu C. Lalsawivunga chuan hmasawnna rahbi thar kaina tur ruahmanna tha leh lian tak tak siam a nih rualin, hlawhtling tur a enkawl chhunzawm chu ngaih pawimawh hle tur a nih thu sawiin, AH& Vety Department hnuai a project kalpui mek leh kalpui tur a buatsaih mekte hlawhtlinna, mipuiin a zar an zo ngei theih nan tan la zel turin kalkhawmte a fuih bawk a ni.

Minister chuan vawk hri tihbaiawm tak, African Swine Fever lak a vawk vulhtute an him theih nan Department-a thawktute chu thahnemngai tak a thawk turin a chah a. Sa, artui leh bawnghnute a intodelh tur chuan a chaw a intodelh hmasak a tul thu sawiin, hemi kawngah hian ngaihtuahna sen tam a pawimawh thu a sawi a. Mi taima leh theihna nei khai chhuahna Sawrkar flagship programme, Hand holding Scheme tihlawhtlingtu nih tum theuh turin MVSA member-te a sawm nghal bawk.

Pu V. Malsawmtluanga, MLA, Vice Chairman, Lunglei High Powered Committee chuan MVSA General Conference vawi 41-na hun a sawm a ni chu lawmawm a tih thu sawiin, ram tihmasawn tur a Department pawimawh tak enkawl tura Minister inpe zo tak an nei chu vannei a tih thu a sawi a. Sawrkar flagship programme, Hand holding Scheme tihlawhtling tur a department pawimawh berte zing ami an nih angin an theihna leh thiamna zawng zawngte chu ran vulhtute tan hmang tangkai turin a fuih a. Kuthnathawktute khawsak dinhmun dawmkan kawngah theihtawp chhuah zel turin MVSA member kalkhawmte a chah a ni.

MVSA General Conference vawi 41-na hi Dr. Robert Rualthankhuma, President, MVSA chuan kaihruaiin, Dr. R.Zothanmawii, Director, A.H& Vety. Department chuan kalkhawmte lawmna thu a sawi a. Dr. V.Lalzarzova, General Secretary, MVSA chuan rorel thupui hrang hrang sawi fiahna hun hmangin, Dr. Rosangzuala, Secretary, MVSA chuan lawmthu sawiin hun hman a khar a ni.

MVSA Conference vawi 41-na ah hian AH&Vety Department kaltlang a Sawrkar flagship programme,.Hand holding Scheme chak leh sawt zawk a kalpui dan tur te, Service a lut thar Officer-te tan Orientation Training Program changtlung zawk ruahman dan tur te leh Transfer & Posting rules felfai tak duan a nih theih nana hmalak dan tur te sawi ho a ni. He hun a tarlan danin AH & Vety Department hmalakna Hand holding Scheme hnuaiah Progress Partner ni tur a loan dilna lut 3647 a awm a, Chief Minister's Special Package dilna lut 13019 a awm tawh bawk a ni.