Vawiin chawhma khan Khatla Vety Polyclinic Hall-ah Mizoram Pig Producers’ Cooperative Federation (PIGFED) Ltd. chuan Annual General Assembly vawi 25-na an hmang a. AH&Vety Minister Pu C. Ngunlianchunga chu Khuallian a ni.

Khuallian Pu C. Ngunlianchunga chuan thu sawiin kan ran vulhte uluk leh fai takin enkawl a pawimawh a, kan vulh dan inenlet a, tun dinhmun aia felfai zawka tan lak a ngai a ni, a ti a. PIGFED Ltd hnuaiah society hrang hrang kan awm a, enge society hian kan thawh chhuah ve tih kan ngaihtuah chian a ngai a, society awm chhan hre rengin mi pakhat in a tih theihloh hi tam zawkin tangrualin kan tithei a ni tih kan hriat reng a tul a ni, a ti a. PIGFED Ltd. chu Federation pawimawh tak an nih thu sawiin vawk vulh chu eizawnna tling a nih thu a sawi a. Ram changkang zawka ran vulh leh enkawl dan tarlangin ram dang atanga ran vulhte lalut lovin keimahni zawk hi pechhuaktu nih tum ang u tiin kalkhawmte chu a fuih a. Hemi atan hian hmun hrang hrang Thingsulthliah, Thingdawl, Lunglei (Lungpuizawl) , Lawngtlai(Mampui) leh Selesihah hma lak a nih thu a sawi a. PRRS vangin vawk an thi nasa a, kuminah ringawt pawh sang chuang an thi a, tum angin hma kan sawn theihloh phah a ni tiin hemi atan hian mi thiam zawk ten theihtawp an chhuah a, hemi bakah hian ran vulhtute kan tanrual a ngai a, he natna hi umchhuah dan ngaihtuahho a ngai a ni, a ti a.  Mimal thahnemngai ruahmanna thui tak neite vawk vulh an thi nasa chu pawi a tih thu a sawi a. Kalkhawmte hnenah chuan keimahni zawn theuhah hmasawn tumin thangtharte tan kawng kawhhmuhtu nih I tum ang u tiin a chah a ni.

PIGFED Ltd. hi June Ni 6, 1989 khan din a ni a, PIGFED Ltd. hnuaiah hian affiliated society 184 awmin member 5000 chuang an awm a. PIGFED Ltd. hmalakna ber chu vawk vulh leh a kaihnawih thil hrang hranga memberte hmasawnna tura hmalak a ni a. Kum 2017-2018 chhung khan vawkpui 3,778 kah rai niin vawk note 15,692 thar chhuah a ni. Kum 2017-2018 chhunga PIGFED-in sum a thawhchhuah zat chu Rs.45,720,567 niin heta tanga sum hlep zat chu Rs. 20,46,943.72 a ni.

PIGFED Chairman Pu F.Zosanga chuan programme hi a kaihruai a, PIGFED Ltd Managing Director Dr. Lalnunhlima Ralte atangin report ngaihthlak a ni a. AH&Vety Director Dr. Hmarkunga chuan thu sawiin Vety Department chuan PIGFED chu harsatna hrang hrang thleng mahse chhel taka dawh hram hram turin leh Department hotute ruahmanna ngaichang thiam turin a fuih a. PIGFED Ltd. Board of Director Pu P.C. Zuanthanga chuan lawmthu sawina in hun a khar a ni. Chawhnu lamah hian Assembly palai rorel neih niin Annual Report 2017-2018, Audit Report, Trading Acount, Provisional Cash Account, Profit & Loss Account 2017-2018, kum 2018-2019 PIGFED Ltd. budget sawiho a ni.