Vawiin hian Lawngtlai Central YLA Hall ah Lai Cultural Festival (Nunphung Puai) hman a ni a, Lawngtlai District DRDA Project Director Pu Beila Khithi, MCS chu khuallian niin Lai hnam ziarang phochuak thei zai, lam leh rimawi hrang hrangte entira hun hman a ni.

Khuallian Pu Beila Khithi chuan Pathianin hnam hrang hrangte min siama, boral tur bika siam a neih a rinawm loh a, hnam tinte hian ram kalphung tibuai hauhlo leh innghirnghona siam chuang silovin kan ziarang leh nunphung theuhte mawi takin kan lanchhuah tir theuh theia a rin thu a sawi bawk. All India Radio hmalakna chu fakin mipui tana rawngbawltu tha tak an nihzia an pho chhuak leh ta a ni a ti.

He Nunphung Puai hun hman a nih theih nana bul tumtu All India Radio, Lunglei Station Deputy Director, Pu D.R Lalropuia chuan India sawrkar chuan ram chhunga hnam tenau zawkte hnam ziarang leh nunphung humhalh sakna dan a neia. All India Radio pawhin sawrkar laipui sum hmangin hetiang kut hi a buatsaih tih sawiin kan hma lawk pawh khan Saiha ah Mara Cultural Festival ropui tak neih a nih tawh thu a sawi a.

Hun hmasa kaihruaitu Pu Lalneikunga chuan Kut hmang tur hian AIR mi leh sa 40 zet te an rawn tel thu sawiin, vawiin hun hman dan chu Lunglei Station ah mai nilo Guwahati leh Delhi a kan hmunpuite pawh kawl that tira kum tam tak hnu pawha enletleh theih tura dahthat an tum thu a sawi.

Festival hi hun hniha then niin chawhma lamah hian Pu Lalneihkunga, Programme Executive, AIR Lungleiin a kaihruaia, Rev. E.F Sanchem’in hunserh a hmang thung. Chawhnu lam hunah chuan Pi H. Lalramliani leh Pu T. Chalnghingluaia ten kaihruaiin Solo, Hlado, Zaipawl leh Lai Cultural Dance leh thil dang tam tak entira hlim taka hun hman a ni.